އަނުޝްކާ ޝަރްމާ އަދި ވިރާޓް ކޯލީގެ ދަރިފުޅުގެ ނަމަކީ ކޮބައިކަން އިނގޭ ހެއްޔެވެ؟ މި ދެމީހުންގެ ދަރިފުޅުގެ ފުރަތަމަ ފޮޓޯވަނީ އިންސްޓަގްރާމުގައި އަނުޝްކާ އާންމުކޮށްފަ އެވެ.
މިފޮޓޯގެ ކެޕްޝަނުން އެނގޭ ގޮތުގައި މި ދެމީހުންގެ ދަރިފުޅުގެ ނަމަކީ ވަމިކާއެވެ. މިއީ އަނުޝްކާ އަދި ވިރާތް ގެ ނަމާއި ގުޅުވާއިގެން ކިޔައިފައިވާ ނަމެކެވެ.
މި ފޮޓޯއިން ފެނިގެންދަނީ އަނުޝްކާ، ވަމިކާ އުރައިގެން ހުއްޓައެވެ. އަދި ވިރާޓް އާއި އަނުޝްކާ ވަރަށް ލޯބިން ތުއްތު ދަރިފުޅަށް ބަލަން ތިބޭ މަންޒަރު މި ފޮޓޯއިން ފެނިގެން ދެއެވެ.
View this post on Instagram
މިއަހަރުގެ ޖަނަވަރީ މަހުގެ 11 ވަނަ ދުވަހު އަނުޝްކާ ވިހައިފައިވާއިރު، ކްރިކެޓު ކުޅުންތެރިޔާ ވިރާޓް ވަނީ އެ އުފާވެރި ޚަބަރު މީސްމީޑިއާގައި ހިއްސާ ކޮށްފައެވެ. އޭނާ އެދުވަހު ކޮށްފައިވާ ޕޯސްޓެއްގައިވާ ގޮތުން އެދުވަހުގެ މެންދުރުގެ ވަގުތެއްގައި އަނުޝްކާ ވަނީ ވިހާފައެވެ.
އަދި ދަރިފުޅާއި އަނުޝްކާގެ ހާލު ރަނގަޅުކަމަށްވެސް އޭނާ ވަނީ ބުނެފައެވެ. މިއަށްފަހު ދަރިފުޅުގެ ފޮޓޯއެއް އާންމު ކުރި މިއީ ފުރަތަމަ ފަހަރެވެ. މީގެ ކުރިން ވިރާޓްގެ ބޭބެ ވިކާސް ކޯލީ އާންމު ކޮށްފައިވާ ފޮޓޯއަކީ ވަމިކާގެ ފޮޓޯއެއް ނޫންކަމަށް ވިކާސް ވަނީ ބުނެފައެވެ. ވިކާސް އާންމު ކޮށްފައިވާ ފޮޓޯއިން ފެނިގެންދަނީ ބްލޭންކެޓެއްގެ ތެރެއިން ކުޑަ ކުޑަ ފައެކެވެ.
ވަމިކާ، ވިރާޓް އަދި އަނުޝްކާގެ މި ލޯބި ފޯޓޯއަށް ގިނަ ބައެއްގެ ލޯބި ލިބިގެން ދިޔައެވެ. އަނުޝްކާ އަދި ވިރާޓްގެ ކައިވެންޏަށް މިހާރު މިވަނީ ތިން އަހަރުވެގެން ގޮސްފައެވެ.
