މިޔަންމާގެ އަސްކަރިއްޔާއިން ގެނައި ބަޢާވާތަށް ތާއީދު ނުކުރާ ކަމަށާ، އެހެންނަމަވެސް، ގައުމުގެ ލީޑަރެއްގެ ގޮތުގައި ހުންނެވި އަންސަންގ ސޫކީއަތުން ބާރުތައް ބީވެގެން ދިއުމުން ހިތާމަ ނުކުރާކަމަށް، ގައުމުން ބޭރުކޮށްފައިވާ ރޮހިންގާ މުސްލިމުން ބުނެފިއެވެ.
ބަންގލަދޭޝްގެ ކޯޒްސް ބާޒާރު ޑިސްޓްރިކްޓުގައި ގާއިމް ކޮށްފައިވާ ސްޕްރޯލިންގ ކުޓުޕަލޯންގ ރެފިއުޖީ ކޭމްޕުގައި، ހުންނަވާ، ރޮހިންގޔާ ކޮމިއުނިޓީ ލީޑަރ މުހައްމަދު ޔޫނުސް އަރުމާން ވިދާޅުވީ، މިޔަންމާރގެ އަސްކަރިއްޔާއިން އެގައުމުގެ ރަޚިންސްޓޭޓުގައި އެމީހުންގެ އާއިތަކުގެ މީހުން މަރާ ހުސްކޮށްފައިވަނީ އަންސަންގ ސޫކީގެ ވެރިކަމުގައި ކަމުގައެވެ.
"އެހުރިހާ ޖަރީމާއެއް ހިންގިއިރު އޭނާ ހުރީ ހަނު. އެންމެ ކުޑަމިނުން 'ރޮހިންގޔާ' މިބަސްވެސް އޭނާގެ ދުލުން ބުނެލާކަށް ނުކެރުނު. އެއް ދުވަސްވަރެއްގައި އަހަރުމެން އޭނާއަށް ކާމިޔާބާއި ކުރިއެރުން ދެއްވާތޯ ދުޢާކޮށް ހެދިން، އަދި އޭނާއަކީ ރާނީއަކަށް ހަދައިގެންވެސް އުޅުނިން. އެހެންނަމަވެސް، 2017 ވަނަ އަހަރަށްފަހު އަހަރުމެންނަށް އޭނާގެ ހަގިގީ ސިފަ ފެނިގެން ދިޔައީ،" އޭނާ ވިދާޅުވިއެވެ.
މިހަފްތާގެ ހޯމަދުވަހު، މިޔަންމާރގެ ބާރުގަދަ އަސްކަރިއްޔާއިންވަނީ، ޑިމޮކްރަޓިކް އުސޫލުން އިންތިޚާބުކޮށްފައިވާ އަންސަންގ ސޫކީގެ ވެރިކަމާ ދެކޮޅަށް ބަޢާވާތެއް ގެނެސް، އަންސަންގ ސޫކީއާ އޭނާއަށް ތާޢީދުކުރާ ސިޔާސީ ވެރިން ބަންދު ކޮށްފައެެވެ.
ސައުތު އޭޝިއާގެ، ބުޑިސްޓުންގެ މެޖޯރީޓީއެއް އޮންނަ މިގައުމުގައި އަސްކަރިއްޔާއިންވަނީ، އެއް އަހަރުދުވަހުގެ މުއްދަތަށް ކުއްލި ނުރައްކަލުގެ ހާލަތުވެސް އިއުލާން ކޮށްފައެވެ.
"އޭނާ (އަންސަންގ ސޫކީ)ގެ އަތުން ވެރިކަމުގެ ބާރުތައް ބީވެދިއުމަކުން އަހަރެމެން ހިތާމައެއް ނުކުރަން،" ރޮހިންގޔާ ކޮމިއުނިޓީ ލީޑަރު އަރުމާން ވިދާޅުވިއެވެ.
ބަންގްލާދޭޝްގެ ދެކުނު ސަރަހައްދުގެ ކޯޒް ބާޒާރު ނަމަކަށް ކިޔާ ސަރަހައްދުގައި ގާއިމް ކޮށްފައިވާ ރެފިއުޖީ ކޭމްޕަކީ، މުސްލިމް މެޖޯރިޓީ އޮންނަ ރޮހިންގޔާ ދަރިކޮޅުގެ ރެފިއުޖީން ދިރިއެޅެން ގާއިމްކޮށްފައިވާ ސަރަހަދެކެވެ. މި ރެފިއުޖީ ކޭމްޕުގައި މިލިއަނެއްހާ މީހުން ދިރިއުޅެމުންދާއިރު، މީހުން ދިރިއުޅެމުންދަނީ، ތޮއްޖެހިފައިވާ ހާލުގައި، އަދި މީހުން ނިދާ ހަދަނީ ޑިއުޓީ ބަހާ އުސޫލުންނެވެ.
އަދި މިއީ މިހާރު ދުނިޔޭގައި އޮތް އެންމެ ބޮޑު ރެފިއުޖީ ކޭމްޕެވެ. މިކޭމްޕުގައި ދިރިއުޅޭ މީހުން 2017 ވަނަ އަހަރު، މިޔަންމާރގެ ސަރުކާރުން، އެމީހުންގެ ގެދޮރުން ނެރެ، ފައްސާލއިރު، އެދަރިކޮޅުގެ މިޔަންމާ ރައްޔިތުން ދެކޮޅަށް އެގައުމުގެ އަސްކަރިއްޔާއިން ހިންގާފައިވަނީ، އިންސާނިއްޔަތާ ޚިލާފު ބޮޑެތި ޖަރިމާތަކެއް ކަމުގައި، ޔޫއެންއިންވެސް ވަނީ ބުނެފައެވެ.
މިޔަންމާއިން ބުނެފައިވަނީ، ބަންގްލަދޭޝް ސަރުކާރާއެކު ހެދޭ ބައިލެޓްރަލް އެއްބަސްވުމެއްގެ ދަށުން، ރޮހިންގޔާ ދަރިކޮޅުގެ މީހުން އެގައުމަށް އެބުރި އައުމުގެ ފުރުސަތު ދިނުމަށް އެގައުމުން އޮތީ ތައްޔާރަށެވެ. އަދި މިމަސައްކަތް ފެށުމަށް ކުރިން ހަމަޖެހިފައިއޮތީ މިއަހަރުގެ ފަހުކޮޅުއެވެ.
ފާއިތުވެދިޔަ ޖެނުއަރީމަހު، ބަންގަލަދޭޝުން ވަނީ، މި ރެފިއުޖީ ކޭމްޕުގައި ދިރިއުޅެމުންދާ ބައެއް ރެފިއުޖީން، ތޫފާންތައް ގިނައިން އަންނަ، ބޭ އޮފް ބެންގާލްގައި ވަކިން އޮންނަ ރަށެއްކަމުގައިވާ، ބަންގ ޗާރ އައިލޭންޑަށް ބަދަލުކުރަން ފަށާފައެވެ. މިހާތަނަށް އައިއިރު، ބަންގްލާދޭޝް ސަރުކާރުން ވަނީ، މިރެފިއުޖީ ކޭމްޕުގައި ދިރިއުޅެމުންދިޔަ 7،000 ރެފިއުޖީން މިރަށަށް ބަދަލު ކޮށްފައެވެ.
މިޔަންމާރގައި ފާއިތުވެދިޔަ ހަފްތާގައި އަސްކަރިއްޔާއިން ގެނައި ބަޢާވާތަށްފަހު، ގައުމުން ބޭރުކޮށްފައިވާ ރޮހިންގޔާ މުސްލިމުން އެބުރި އައުމަށް ކުރެވެމުންދާ މަސައްކަތްތަކާ ގުޅޭގޮތުން މިހާރުވަނީ ސުވާލު އުފެދިފައެވެ.
ކޮމެންޓު ފޮނުވާ