މުޅި ރާއްޖެއަށް ބެންކިންގ ހިދުމަތް ފުޅާކުރުމަށްޓަކައި ބެންކް އޮފް މޯލްޑިވްސް އިން ކުރަމުންދާ މަސައްކަތުގެ ދަށުން މިއަހަރު ތެރޭ އިތުރު 100 ކޭޝް އޭޖެންޓުން ހަމަޖެއްސުމަށް ނިންމާފައި ވާކަމަށް ބީއެމްއެލުން ބުނެފިއެވެ.
ކޭޝް އޭޖެންޓުންނަކީ ބޭންކްގެ ބްރާންޗް ތަކާއި ސެލްފް ސަރވިސް އޭޓީއެމް ޚިދުމަތް ނުލިބޭ ރަށްރަށުގައި އެ ފަރާތްތައް މެދުވެރިކޮށް ފައިސާ ޖަމާކުރުމާއި ފައިސާދެއްކުމުގެ ހިދުމަތް ދިނުމަށް ބީއެމްއެލުން ކަނޑައަޅާ ވިޔަފާރި ތަކެކެވެ. މިގޮތުން ކޭޝް އޭޖެންޓުން މެދުވެރިކޮށް ދުވާލަކު 2000 ރުފިޔާ ނެގޭނެ އިންތިޒާމް ހަމަޖައްސާފައި ވާއިރު ދުވާލަކު 10000 ރުފިޔާ ކޭޝް އޭޖެންޓުން މެދުވެރިކޮށް ޖަމާކުރެވޭނެ ކަމަށް ބީއެމްއެލުން މައުލޫމާތުދެއެވެ.
ކޭޝް އޭޖެންޓުން މެދުވެރިކޮށް ކަސްޓަމަރުންނަށް އެކައުންޓުން ފައިސާ ނެގުމުގެ އިތުރުން އެކައުންޓަށް ފައިސާ ޖަމާކުރުމާއި، ކްރެޑިޓް ކާޑާއި ލޯނަށް ފައިސާ ދެއްކުމުގެ ހިދުމަތް ލިބެއެވެ. އަދި މިއީ އެއްވެސް ފީ އަކާ ނުލާ ބޭންކުން ފޯރުކޮށްދެމުން އަންނަ ހިދުމަތެކެވެ.
ބީއެމްއެލުން ކޭޝް އޭޖެންޓުން ތަޢާރަފްކުރުމާއެކު އެ ހިދުމަތަކީ ކަސްޓަމަރުންގެ މެދުގައި މަގްބޫލް ހިދުމަތަކަށްވެފައި ވާކަމަށް ބެންކުން ބުނެއެވެ. އެގޮތުން މިދިޔައަހަރުވެސް ރާއްޖޭގެ އެކި ކަންކޮޅުތަކުގައި ގާއިމްކުރެވިފައިވާ 41 ޑިޕޮސިޓް ކޭޝް އޭޖެންޓުން މެދުވެރިކޮށް 180 މިލިއަން ރުފިޔާ ބެންކުގެ ކަސްޓަމަރުން ޖަމާކޮށްފައި ވާކަމަށް އެ ބެންކުން ބުނެއެވެ.
މި ހިދުމަތަކީ ބީއެމްއެލް ގެ ބްރާންޗެއް ނުވަތަ އޭޓީއެމްއެއް ނެތް ރަށްރަށުގައި އަސާސީ ބޭންކިންގ ހިދުމަތް ފޯރުކުރުމަށްޓަކައި 2014 ވަނަ އަހަރު ތައާރަފް ކުރެވުނު ހިދުމަތެކެވެ. މިހާރުވެސް 200 އަށް ވުރެ ގިނަ ކޭޝް އެޖެންޓުން މެދުވެރިކޮށް ފައިސާ ނެގުމުގެ ހިދުމަތް އެ ބެންކުން އަންނަނީ ފޯރޮކޮށްދެމުންނެވެ.
