ބޭހާއިބެހޭ ތަފާތު އުފެއްދުންތައް އުފެއްދުމަށް މަޝްހޫ އެމެރިކާގެ ކުންފުންޏެއް ކަމުގައިވާ ޖޯންސަން އެންޑް ޖޯންސަންއިން އުފައްދާ، މިހާރު ތަހުލީލު މަރުހަލާގައިވާ ކޯވިޑް ވެކްސިންގެ ޓެސްޓު މަރުހަލާތައް އެ ކުންފުނިން ވަގުތީ ގޮތުން މަޑު ޖައްސާލައިފިއެވެ.
އެކުންފުނިން މަޢޫލޫމާތު ދޭގޮތުގައި މި ޓެސްޓު ކުރުންތައް މަޑުޖައްސާލާފައިވަނީ ތަޖުރިބާ ކުރުމުގެ ގޮތުން ވެކްސިން ދެމުންދިޔަ ވޮލަންޓިއަރަކު ކުއްލިއަކަށް ބަލި ވުމާއިގުޅިގެންނެވެ. ޖޯންސަން އެންޑް ޖޯންސަންއިން ނެރުނު ބަޔާނެއްގައި ބުނެފައިވަނީ ތަޖުރިބާ ކުރުމުގެ ގޮތުން ވެކްސިން ދެމުންދިޔަ ވޮލަންޓިޔަރަކު ބަލިވުމާއި ގުޅިގެން އޭނާގެ ހާލަތު އިތުރަށް ރިވިވްކޮށް އަދި 'އެސެމްބްލް އިންޑަޕެންޑެންޓް ޑޭޓާ މޮނިޓަރިން ބޯޑު’އިންނާއި އަދި އެ ކުންފުނީގެ އެތެރޭގެ މިންގަޑުތަކުގެތެރެއިން އިވޭލުޓުކޮށް ނިމެންދެން ވެކްސިން ތެޖުރިބާ ކުރުމުގެ މަރުހަލާތައް ވަގުތީގޮތުން ވަނީ ހުއްޓުމަކަށް ގެނެވިފައެވެ. އަދި ބުނެފައިވާ ގޮތުގައި، ކްލިނިކަލް ޓެސްޓުތަކުގެ މަރުހަލާގައި، އެކްސިޑެންޓުތައް ދިމާވުމާއި، ތަހުލީލުގެ މަރުހަލާގައި ހުންނަ މީހަކު ބަލިވުމާއި އަދި މިނޫނަސް މިފަދަ ހާދިސާތައް ހިގައި ދިއުމަކީ ކުރިމަތިވެދާނެ ގޮންޖެހުމެއް ކަމަށްބަލާ މިއީ އަބަދުވެސް ތައްޔާރަށް ތިބޭ ކަންކަމެވެ.
ކޯވިޑް ވެކްސިން ތައްޔާރު ކުރަމުންދަނީ ޖޯންސަން އެންޑް ޖޯންސަންގެ ވެކްސިންތަކަށް ޚާއްސަކުރެވިފައިވާ ބައިންނެވެ. އަދި ވެކްސިންގެ ބައިވެރިޔަކަށް މިދިމާވީ ކޮން ބާވަތެއްގެ ބަލިމަޑުމަކެއް ކަމެއް މިހާތަނަށް މިކުންފުނިން ހާމަ ކޮށްފައެއް ނުވެއެވެ. އެހެންނަމަވެސް، ވެކްސިންގެ ކްލިނިކަލް ޓެސްޓުތަކުގެ އެއް ބޭނުމަކީ ވެކްސިންގެ ސަބަބުން ކުރިމަތިވެދާނެ ނުރައްކާތެރި ބަލިމަޑުކަމެއް އޮތްކަން ނުވަތަ ނެތްކަން ޔަގީން ކުރުމެވެ. މިގޮތުން ވެކްސިންތައް ޓެސްޓު ކުރުމުމުގެ މަރުހަލާގައި ވޮލަންޓިޔަރުންގެ ސިއްޙީ ހާލަތު އަބަދުވެސް ޑޮކްޓަރުން ބަލަމުންދެއެވެ. މިގޮތުން ޑޮކްޓަރުންނަށް ވެކްސިނާއި ގުޅުންހުރެދާނެކަމަށް ބެލެވޭ އެއްވެސް އަލާމާތެއް އެވެސް ވޮލަންޓިއަރެއްގެ ފަރާތުން ފެނިއްޖެނަމަ މިފަދަ އަލާމާތެއްގެ އަސްލު ދެނެގަނެވެންދެން ވެކްސިން ޓެސްޓުކުރުމުގެ މަރުހަލާތައް ހުއްޓުމަކަށް ގެނެވެއެވެ.
އެމެރިކާގައި ކުރިޔަށްދާ ޖޯންސަން އެންޑް ޖޯންސަންގެ ވެކްސިން ޓްރަޔަލް އަކީ މިހާރު އެމެރިކާގައި ކުރިޔަށްދާ ކޯވިޑް ވެކްސިންގެ ޓެސްޓްތަކުގެ ތެރެއިން އެންމެ ބޮޑު ޓްރަޔަލްއެވެ. މިގޮތުން މި ވެކްސިން ޓެސްޓު ކުރުމަށްޓަކާ 60000 ވޮލަންޓިޔަރުންނަށް މިވެކްސިން ދެވޭނެއެވެ. މިކުންފުނިން އުފައްދާ މިވެކްސިން މިހާރުވަނީ ޓެސްޓުކުރުމުގެ 3 ވަނަ މަރުހަލާގައެވެ. މި މަރުހަލާއަކީ، އާންމު ރައްޔިތުންގެ ތެރެއިން ގިނަ އަދަދެއްގެ ވޮލަންޓިއަރުންނަށް ވެކްސިން ދީގެން އެފަރާތްތަކުން ވެކްސިންއަށް 'ރިއެކްޓު' ކުރާގޮތް ދެނެގަތުމެވެ. ޖޯންސަން އެންޑް ޖޯންސަންގެ ވެކްސިންގެ މި މަރުހަލާ ފެށިފައިވަނީ ވޭތުވެދިޔަ ސެޕްޓެމްބަރު މަހުގައެވެ. މިވެކްސިންއަކީ މިހާރު އެމެރިގާގައި ތަޖުރިބާ ކުރެވެމުންދާ 6 ވެކްސިނެއްގެ ތެރެއިން އެއް ވެކްސިނެވަ. އަދި އެންމެ ފަހުގެ މަރުހަލާއާއި ހަމައަށް ގޮސްފައިވާ 4 ވެކްސިންގެ ތެރެއިން އެއް ވެކްސިންވެސްމެއެވެ.
