ބަންގްލަދޭޝްގެ އާ ރައީސް އާލަމްގީރަށް ރައީސް މުޢިއްޒު ތަހުނިޔާ ފޮނުއްވައިފި

ބަންގްލަދޭޝްގެ ރައީސްކަމުގެ މަގާމަށް އަލަށް އިންތިޚާބުވެވަޑައިގެންނެވި މިރުޒާ ފަޚުރުލް އިސްލާމް އާލަމްގީރަށް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަހުނިޔާ ފޮނުއްވައިފިއެވެ.

ރައީސް ފޮނުއްވި ސިޓީފުޅުގައި، އާ ރައީސްގެ ޒައާމަތުގައި ދިވެހިރާއްޖެއާއި ބަންގްލަދޭޝްއާ ދެމެދު އޮންނަ ޒަމާންވީ ގުޅުން އިތުރަށް ބަދަހިވެ، ތަފާތު ދާއިރާތަކުން ދެ ގައުމުގެ އެއްބާރުލުން ފުޅާވެގެންދާނެ ކަމަށް އުންމީދު ކުރައްވާ ކަމަށް ވިދާޅުވެފައި ވެއެވެ. އަދި ފާއިތުވި 35 އަހަރުގެ ތެރޭގައި ވާދަވެރި ވޯޓަކުން ބަންގްލަދޭޝްގައި ރައީސަކު އިންތިޚާބުކުރި ފުރަތަމަ ފަހަރު ކަމަށްވާ މި އިންތިޚާބަކީ އެ ގައުމުގެ ޑިމޮކްރެޓިކް ހަޔާތުގައި ލިބުނު މުހިންމު ކުރިއެރުމެއް ކަމުގައި އެމަނިކުފާނު ސިފަކުރެއްވިއެވެ.

އުމުރުން 78 އަހަރުގެ އާލަމްގީރު ރައީސްކަމުގެ މަގާމަށް އިންތިޚާބުވެވަޑައިގަތީ މިދިޔަ ބުރާސްފަތި ދުވަހު ބޭއްވި ޤާނޫނުހަދާ މަޖިލީހުގެ ވޯޓުގައި، އިދިކޮޅު ކެންޑިޑޭޓް ރިޓަޔަރޑް ކާނަލް އޮލީ އަޙްމަދާ ވާދަކުރައްވައި 255 ވޯޓު ހޯއްދަވައިގެންނެވެ. އޮލީ އަޙްމަދަށް ލިބިވަޑައިގަތީ 88 ވޯޓެވެ. މި އިންތިޚާބު ބާއްވަން ޖެހުނީ ކުރީގެ ރައީސް މުޙައްމަދު ޝަހާބުއްދީން ސިއްހީ ސަބަބުތަކާ ހުރެ ޖުލައި 24 ގައި މަގާމުން އިސްތިއުފާ ދެއްވުމުންނެވެ.