ނިމިދިޔަ ޖުލައި މަހުގެ ތެރޭގައި މާލޭގެ 18 ސަރަހައްދެއްގެ މަގު މަރާމާތުކޮށް، މަގުމަތީގެ ސަލާމަތީ ނިޝާންތައް އާކޮށްފައިވާ ކަމަށް މާލެ ސިޓީ ކައުންސިލުން ބުނެފި އެވެ.
ސިޓީ ކައުންސިލްގެ ތަފާސްހިސާބުތައް ދައްކާ ގޮތުން، ޖުލައި މަހުގެ ފުރަތަމަ ދުވަހުން ފެށިގެން މަހުގެ ނިޔަލަށް 25 މަގެއްގައި ހުރި 33 ކާނުމަތި ބަދަލުކޮށްފައިވެއެވެ. އަދި ނުކުޅެދުންތެރިކަން ހުންނަ ފަރާތްތަކަށް މަގުތައް ބޭނުންކުރުމުގައި ފަސޭހަކޮށްދިނުމުގެ ގޮތުން 10 ސަރަހައްދެއްގައި ރޭންޕު ހަދާ ނިންމާފައިވާ ކަމަށް ކައުންސިލުން މައުލޫމާތު ދެއެވެ.
މަގުމަތީގެ ސަލާމަތީ ކަންކަން ވަރުގަދަކުރުމުގެ ގޮތުން، 41 މަގެއްގައި ސްޕީޑް ބްރޭކަރުގެ 42 ނިޝާނާއި، 52 މަގެއްގައި ޒިބްރާ ކްރޮސްގެ 54 ނިޝާން ވެސް ވަނީ އަލުން ކުރަހާފައެވެ. މި މަސައްކަތްތަކަކީ މަގު ބޭނުންކުރާ އެންމެންނަށް ވެސް ބޮޑު ފަސޭހައެއް ލިބިގެންދާނެ މުހިންމު މަސައްކަތްތަކެއް ކަމަށް މާލެ ސިޓީގެ މޭޔަރ އާދަމް ޢާޒިމް ވިދާޅުވި އެވެ.
"މި ކަމަކީ މާލެ ސިޓީ ކައުންސިލުން އަބަދުވެސް ކުރަމުން އަންނަ، އަދި ރައްޔިތުންގެ ސަލާމަތަށްޓަކައި އިސްކަންދޭ ކަންކަން،" މޭޔަރ ވިދާޅުވި އެވެ.
ސިޓީ ކައުންސިލުން ބުނީ، މާލޭގެ މަގުތަކަކީ ހިނގާބިނގާވެ އުޅޭ މީހުންނާއި އުޅަނދުފަހަރަށް އަމާން ތަނަކަށް ހެދުމަށްޓަކައި މަރާމާތުގެ މަސައްކަތްތައް މެދުނުކެނޑި ކުރިއަށްގެންދާނެ ކަމަށެވެ.
ކޮމެންޓު ފޮނުވާ