ޔޫރަޕިއަން ޔޫނިއަން (އީޔޫ) އަދި ބެލްޖިއަމަށް ދިވެހިރާއްޖެއިން ކަނޑައަޅާ ސަފީރުގެ މަޤާމަށް، ކުރީގެ ބަންޑާރަނައިބު ފާޠިމަތު ދިޔާނާ ސަޢީދު އައްޔަންކުރުމަށް ރައްޔިތުންގެ މަޖިލީހަށް ހުށަހަޅައިފިއެވެ.
މި މަޤާމަށް ދިޔާނާ އައްޔަންކުރުމަށް ރުހުން ހޯއްދެވުމަށް އެދިވަޑައިގެން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މަޖިލީހަށް ސިޓީފުޅެއް ފޮނުއްވާފައެވެ. އެ ސިޓީފުޅުގައި ރައީސް ވިދާޅުވެފައިވަނީ، ދިޔާނާގެ ނަންފުޅު ހުށަހަޅުއްވާފައިވަނީ ރާއްޖޭގެ ޤާނޫނުއަސާސީ އާއި ފޮރިން ސަރވިސްގެ ޤާނޫނުގައި ބަޔާންކޮށްފައިވާ ގޮތުގެ މަތިން ކަމަށެވެ. މަޖިލީހުގެ ތަޅުމުގައި މި ސިޓީފުޅު އިއްވުމަށްފަހު، އޭނާއަށް ރުހުން ދިނުމާމެދު ގޮތެއް ނިންމުމަށްޓަކައި މައްސަލަ މިހާރު ވަނީ ޚާރިޖީ ގުޅުންތަކާބެހޭ ކޮމިޓީއަށް ދިރާސާކުރަން ފޮނުވާފައެވެ.
ދިޔާނާ ސަޢީދަކީ ރާއްޖޭގައި ފާހަގަކޮށްލެވޭ ތަޖުރިބާކާރު އަދި ކުޅަދާނަ ޤާނޫނީ ވަކީލެކެވެ. މީގެ ކުރިން އޭނާ ވަނީ ރާއްޖޭގެ ބަންޑާރަނައިބުކަމުގެ އިތުރުން، ސާކްގެ ސެކްރެޓަރީ ޖެނެރަލްކަމުގެ މުހިންމު މަޤާމުވެސް އަދާކުރައްވާފައެވެ.
ކޮމެންޓު ފޮނުވާ