މިއަހަރުގެ ފުރަތަމަ 13 ދުވަހުން ރާއްޖެއަށް ރަޝިޔާގެ 10،002 ފަތުރުވެރިން އައިސްފައި ވާކަމަށް ޓޫރިޒަމް މިނިސްޓްރީން ބުނެފިއެވެ.
ޓޫރިޒަމް މިނިސްޓްރީން އާއްމުކޮށްފައިވާ ތަފާސް ހިސާބުތައް ދައްކާގޮތުން ބުދަ ދުވަހުގެ ނިޔަލަށް ރާއްޖެއަށް އެންމެގިނައިން އައީ ރަޝިޔާއަށް ނިސްބަތްވާ ފަތުރުވެރިންނެވެ. ދެވަނައަށް އެންމެގިނައިން ރާއްޖެއަށް އައީ އިންޑިއާއަށް ނިސްބަތްވާ ފަތުރުވެރިންނެވެ. އެގައުމުން ބުދަދުވަހުގެ ނިޔަލަށް 5،727 ފަތުރުވެރިން ރާއްޖެއަށް ވަނީ އައިސްފައެވެ.
3 ވަނައަށް ރާއްޖެއަށް އެންމެ ގިނައިން އައީ ޔޫކްރެއިނަށް ނިސްބަތްވާ ފަތުރުވެރިންނެވެ. އެގޮތުން އެގައުމަށް ނިސްބަތްވާ 3،472 ފަތުރުވެރިން ވަނީ ރާއްޖެއައިސްފައެވެ. ޔޫކްރެއިން ފާހަގަވަނީ އެހެން އަހަރުތަކާއި އަޅާބަލާއިރު ރާއްޖެއަށް އެވްރެޖްގޮތެއްގައި ގިނައަދަދެއްގެ ފަތުރުވެރިން އަންނަ ގައުމެއްގެ ގޮތުގައެވެ. އެގޮތުން ކޯވިޑްގެ ބަލިމަޑުކަމަށްފަހު އެގައުމުން ރާއްޖެއަށް އަންނަ މީހުންގެ އިންސައްތަ ވަނީ އެތަށް ގުނައެއް މައްޗަށް ޖެހިލާފައެވެ. އެގޮތުން މިދިޔަ އަހަރުގެ ޖަނަވަރީ މަހުގެ ފުރަތަމަ 13 ދުވަހާއި އަޅާބަލާއިރު ޔޫކްރައިނުން ރާއްޖެއައި ފަތުރުވެރިންގެ އިންސައްތަ މިއަހަރުގެ އެމުއްދަތުގައި ވަނީ 144.3 އިންސައްތައަށް ކުރިއަށްޖެހިލާފައެވެ.
މިއަހަރުގެ މިހާތަނަށް ރާއްޖެއައި އެންމެ ގިނަ ފަތުރުވެރިން ނިސްބަތްވާ ގައުމުތައް:
1 ރަޝިއާ – 10،002
2 އިންޑިއާ – 5،727
3 ޔޫކްރައިން – 3،472
4 ކަޒަކިސްތާން – 2،034
5 ރޯމޭނިއާ – 1،534
6 އިނގިރޭސި ވިލާތް – 1،495
7 ފްރާންސް – 1،418
8 ޖަރުމަން – 1،365
9 އެމެރިކާ – 859
10 ސްވިޓްޒަލޭންޑް – 717
މިދިޔަ އަހަރުގެ ފުރަތަމަ 13 ދުވަހާއި އަޅާބަލާއިރު ރާއްޖެއަށް ފަތުރުވެރިން އަންނަ މާކެޓްތަކަށް މިވަނީ މިއަހަރު ވަރަށްބޮޑެތި ބަދަލުތަކެއް އައިސްފައެވެ. އެގޮތުން އެންމެ ބޮޑު ކުރިއެރުމެއް މިއަހަރު ހޯދާފައިވަނި އުޒްބެކިސްތާނާއި ޔޫކްރެއިންގެ މާކެޓެވެ.
އުޒްބެކިސްތާނުން މިދިޔަ އަހަރުގެ މި މުއްދަތުގައި ރާއްޖެއައީ 145 ފަތުރުވެރިންނެވެ. ނަމަވެސް މިއަހަރު މިހާތަނަށްވަނީ 665 ފަތުރުވެރިން އުޒްބެކިސްތާނުން ރާއްޖެއަށް އައިސްފައެވެ. އެހެންކަމުން އެ މާކެޓް 358.6 އިންސައްތަ އުފުލިފައި ވާކަން ޓޫރިޒަމް މިނިސްޓްރީގެ ހިސާބުތަކުން ދައްކައެވެ. ހަމައެހެންމެ ޔޫކްރެއިނުން މިދިޔަ އަހަރުގެ މި މުއްދަތުގައި 1،421 ފަތުރުވެރިން އައިސްފައި ވާއިރު މި އަހަރު މިހާތަނަށް 3،472 ފަތުރުވެރިން ވަނީ ޔޫކްރައިނުން ރާއްޖެއަށް އައިސްފައެވެ.
ކޯވިޑް-19ގެ ބަލިމަޑުކަމަށްފަހު ރާއްޖެއަންނަ ފަތުރުވެރިން ނިސްބަތްވާ ގައުމުތަކަށް ބޮޑެތި ބަދަލުތަކެއް އައިސްފައި މި ވަނީ، މީގެކުރިން ރާއްޖެއިން މާބޮޑު އިސްކަމެއްނުދޭ ދުނިޔޭގެ ތަފާތު އެކި މާކެޓްތަކަށް ރާއްޖޭގެ ފަތުރުވެރިކަން އިޝްތިހާރުކުރުމަށް ކުރެވެމުން ދާ މަސައްކަތްތަކުގެ ސަބަބުންނެވެ. މީގެއިތުރުން ދުނިޔޭގެ ފެންވަރުގައި ރާއްޖޭގެ ފަތުރުވެރިކަމުގެ ސިނާޢަތުން ހޯދަމުންދާ ކާމިޔާބީ ތަކާއި ރީތި ނަންވެސް ފާހަގަކޮށްލެވެ އެވެ. އަދި ޓްރެވަލް އެންޑް ޓޫސިޒަމް ދާއިރާގެ ބައިނަލްއަގްވާމީ އެކި ޖަމިއްޔާ ޖަމާޢަތްތަކުންވެސް ގަބޫލުކުރާ، މިފަދަ ދަނޑިވަޅަކަށް ސިއްހީގޮތުން އެންމެ ރައްކާތެރި ޓޫރިސްޓް މޮޑެލްއެއް އޮތް ގައުމަކީވެސް ދިވެހިރާއްޖެއެވެ.
