ރައްޔިތުންގެ މަޖިލީހުގެ ގެދޮރުވެރިކަމުގެ ކޮމިޓީގެ މުޤައްރިރުގެ މަޤާމަށް، ހުޅުމާލެ އުތުރު ދާއިރާގެ މެމްބަރު ހުސައިން ޝަރީފް މިއަދު އިންތިޚާބުކުރައްވައިފިއެވެ.
މި މަޤާމު ހުސްވީ ކުރިން އެ މަޤާމުގައި ހުންނެވި އިނގުރައިދޫ ދާއިރާގެ މެމްބަރު އިބްރާހީމް ފަލާޙްގެ ބަދަލުގައި މަނަދޫ ދާއިރާގެ މެމްބަރު ހުސްނީ މުބާރިކް އެ ކޮމިޓީއަށް އައްޔަންކުރެއްވުމާ ގުޅިގެންނެވެ. އައު މުޤައްރިރަކު ހޮވުމަށް ބޭއްވި ބައްދަލުވުމުގައި ހުސައިން ޝަރީފްގެ ނަންފުޅު ވިލިމާލެ ދާއިރާގެ މެމްބަރު މުހައްމަދު އިސްމާޢީލް ހުށަހެޅުއްވިއިރު، އެ ހުށަހެޅުއްވުމަށް ތާއީދުކުރެއްވީ މާފަންނު މެދު ދާއިރާގެ މެމްބަރު އަސްމާ ރަޝީދެވެ. އިތުރު ނަމެއް ހުށަހަޅާފައި ނުވާއިރު، އޭނާ މި މަޤާމަށް ހޮވިވަޑައިގަތީ ކޮމިޓީގެ ބައްދަލުވުމުގައި ބައިވެރިވެވަޑައިގެންނެވި 10 މެމްބަރުންގެ ފުރިހަމަ އިއްތިފާޤުންނެވެ.
މަޤާމާ ހަވާލުވެވަޑައިގަތުމަށްފަހު ވާހަކަފުޅުދައްކަވަމުން ހުސައިން ޝަރީފް ވިދާޅުވީ، ރައްޔިތުންނަށް ދިމާވެފައިވާ ބޯހިޔާވަހިކަމުގެ ދަތިކަން ހައްލުކުރުމަކީ މި ސަރުކާރުން އެންމެ ބޮޑު އިސްކަމެއްދޭ އެއް ކަންތައް ކަމަށެވެ. އަދި ސަރުކާރުން މަޖިލީހަށް ހުށަހަޅާފައިވާ ގެދޮރުވެރިކަމާ ގުޅޭ ބިލަކީ ވަރަށް މުހިންމު މަސައްކަތެއްކަން ފާހަގަކުރައްވައި، ކޮމިޓީއަށް ހުށަހެޅޭ އެހެނިހެން މައްސަލަތައްވެސް ލަސްނުކޮށް، އެންމެ އަވަސް މިނެއްގައި ނިންމަވައިދެއްވާނެ ކަމުގެ ޔަޤީންކަން އޭނާ ވަނީ ދެއްވާފައެވެ.
ކޮމެންޓު ފޮނުވާ