އައްޑޫ ސިޓީ އާއި ހުވަދު އަތޮޅާ ދެމެދު ސީ ޕްލޭންގެ ޚިދުމަތް ދިނުމުގެ ކަންކަން ކުރިއަށް ގެންދިޔައީ އެކަމާ ގުޅުންހުރި އިދާރާގެ ބައިވެރިވުމެއް ނެތި ކަމަށް ޚަބަރު އޮންލައިނަށް ކަށަވަރު ވެއްޖެއެވެ.
ރާއްޖޭގެ ދަތުރު ފަތުރާއި އޭވިއޭޝަން ދާއިރާގެ ހުރިހާ ކަމެއް މެންޑޭޓް ކުރެވިފައި ވަނީ މިނިސްޓްރީ އޮފް ޓްރާންސްޕޯޓް އެންޑް ސިވިލްއޭވިއޭޝަންގެ ނަމުގައި ރައީސުލްޖުމްހޫރިއްޔާ އުފައްދަވާފައިވާ ވުޒާރާއްގެ ބެލުމުގެ ދަށުންނެވެ. އެ ވުޒާރާއަށް ރައީސުލްޖުމްހޫރިއްޔާ އައްޔަން ކުރައްވާފައި ވާ ވަޒީރުވެސް މަޤާމުން ދުރުކުރި ކަމެއް ނުވަތަ އިސްތިއުފާ ދެއްވި ކަމެއް އަދި އެނގޭކަށް ނެތެވެ. އެހެން ކަމުން ސަރުކާރުގެ މިހާ މުހިންމު "ބޮޑު" މަޝްރޫޢެއް ފެއްޓެވިއިރު އެކަން މެންޑޭޓް ކުރެވިފައި ވާ ވަޒީރު ފޮޓޯ އަކުން ވެސް ނުފެނުމީ ސުވާލު އުފެދޭނެ ކަމެއް ނޫންތޯއެވެ؟
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް، އިޤްތިޞާދީ ހަބެއްގެ ގޮތުގައި އައްޑޫ ސިޓީ ތަރައްޤީ ކުރައްވާނެކަމަށް ވެފައިވާ ވަޢުދުފުޅުގެ ދަށުން މިހާތަނަށް ފައްޓަވާފައިވާ އެންމެ ބޮޑު މަޝްރޫޢަކީ ގަން އިންޓަރނޭޝަނަލް އެއަރޕޯޓާއި ހުވަދު އަތޮޅާ ދެމެދު ސީޕްލޭން ދަތުރުތައް ފެށުން ކަމަށް ބައެއް ޓީވީތަކުން އިއްޔެއާއި މިއަދުވެސް އަޅުގަނޑުމެން އަޑުއެހީމުއެވެ. މި އަޑުތައް އިވުމުން ވެސް ހަމަ ހިތަށް އައި ސުވާލަކީ މިކަން ތަންފީޒު ކުރައްވަން ޖެހިވަޑައިގަންނަވާ ވުޒާރާއާއި އެވުޒާރާގެ ވަޒީރު ހަވާސާއިން ބޭރުވީ ކޮން ސަބަބަކާ ހެދި ތޯއެވެ؟
ޓްރާންސްޕޯޓް މިނިސްޓްރީގެ ބައެއް ބޭފުޅުން ނަން ހާމަ ނުކުރުން އެދި ޚަބަރު އޮންލައިނަށް މަޢުލޫމާތު ދެއްވި ގޮތުގައި އައްޑުއާއި ހުވަދު އަތޮޅާ ދެމެދު ސީޕްލޭން ދަތުރުތައް ފެށުމާ ގުޅޭ އެއްވެސް ކަމެއް އެމިނިސްޓްރީއަށް "އެނގިފައި" ނެތެވެ. އަދި ކޯވިޑު-19ގެ މި ބަލިމަޑުކަމުގެ ތެރޭގައިވެސް އައްޑުއަށް ބައެއް ވަޒީރުން ވަޑައިގެން ކުލަގަދަ ރަސްމިއްޔާތު ބާއްވާ، ޕްރެސް ކޮންފަރެންސްތައް ބާއްވާ، ޓީވީ ތަކުން ލައިވް ކުރިއިރު، ޓްރާންސްޕޯޓް އެންޑް ސިވިލްއޭވިއޭޝަން މިނިސްޓަރ ޢާއިޝަތު ނަހުލާ އަށް މިއިން ކަމަކަށް ދަޢުވަތު ވެސް އަރުވާފައި ނުވާކަމަށް ޚަބަރު އޮންލައިނަށް މަޢުލޫމާތު ދެއްވި ފަރާތްތަކުން ވިދާޅުވިއެވެ.
މިކަމާ ގުޅިގެން މިނިސްޓަރ ނަހުލާ ހިތްޕުޅު ހަމަޖެހިވަޑައިނުގެން ރައީސުލްޖުމްހޫރިއްޔާގެ ސަމާލުކަމަށް އެކަން ގެންނަވާފައި ވާކަން ވެސް ޚަބަރު އޮންލައިނަށް ވަނީ ކަށަވަރު ވެފައެވެ. މި ކަންކަމާ ގުޅޭގޮތުން މިނިސްޓަރ ނަހުލާގެ ބަހެއް ހޯދާލުމަށް އަޅުގަނޑުމެންގެ ނިއުސް ޓީމުން ކުރި މަސައްކަތް، އެކަމަނާ ފޯނަށް ޖަވާބު ނުދެއްވާތީ އާއި އަޅުގަނޑުމެންގެ މެސެޖަށްވެސް ޖަވާބު ނުދެއްވާތީ ވަނީ ނާކާމިޔާބު ވެފައެވެ.
ޓްރާންސްޕޯޓު މިނިސްޓަރ ނަހުލާ އަކީ ސަރުކާރު ހިންގާ ކޯލިޝަންގެ އެއް ޕާޓީ ކަމަށްވާ ޖުމްހޫރީ ޕާޓީގެ ވަޒީރެކެވެ. ނަމަވެސް މި ފަކަށް އައިސް ސަރުކާރު ކޯލިޝަންގެ މައި ޕާޓީ އެމްޑީޕީއަށް ނިސްބަތްވާ މަޖިލިސް މެމްބަރުންނާއި އެމްޑީޕީގެ ބައެއް އިސްވެރިން، ސަރުކާރު ކޯލިޝަންގައި ހިމެނޭ އެހެން ޕާޓީތަކަށް ނިސްބަތްވާ ވަޒީރުންނަށް ބަހުގެ ހަމަލާދެއްވައި، އެ ވަޒީރުންނާއި މަތިކުރެވިފައި ވާ މަސްޢޫލިއްޔަތުތައް އަދާނުކުރައްވާ ކަމުގެ ތުހުމަތުތަށް އަންނަނީ ކުރައްވަމުންނެވެ. އަދި ކޯލިޝަނަކުން ވެރިކަން ކުރަން ދަތިކަމަށާއި އެކަމުގެ ސަބަބުން ރައީސް އިބްރާހިމް މުޙައްމަދު ސޯލިޙް ވެވަޑައިގަތް "އެމްޑީޕީ"ގެ ވައުދުތައް ފުއްދުމުގައި ވެސް ލަސްތަކެއް މެދުވެރިވާ ކަމަށްވެސް ބައެއް ބޭފުޅުން ދަނީ ވިދާޅުވަމުންނެވެ.
ނަމަވެސް 2018ގެ އިންތިޙާބުގެ ކެމްޕެއިން ތެރޭގައި ރައްޔިތުންނަށް ފެނުނީ "ކޯލިޝަނެއް"ގެ މެނިފެސްޓޯއެކެވެ. ކޯލިޝަނެއްގެ ވައުދު ތަކެކެވެ. މެޖޯރިޓީ ރައްޔިތުން ވޯޓުލީވެސް ކޯލިޝަނަކުން ދެއްކި ކެނޑިޑޭޓަކަށެވެ. އަދި ރައީސުލްޖުމްހޫރިްޔާ އިބްރާހިމް މުޙައްމަދު ޞާލިހްވެސް ވިދާޅުވަމުން ގެންދަވަނީ ކޯލިޝަނާއިގެން ކުރިއަށްދާނެ ވާހަކައެވެ. ނަމަވެސް ސަރުކާރު ހިންގާ މައި ޕާޓީ އެމްޑީޕީގައި އިސްކޮށް ޙަރަކާތްތެރިވާ ފަރާތްތަކުން މިކަމުގައި ރައީސްގެ ވިސްނުންފުޅާ ޚިޔާލު ތަފާތުކަން ފާޅުގައި ދަނީ ހާމަކުރަމުންނެވެ.
