ދުނިޔޭގެ ދުންފަތުގެ އިސްތިއުމާލު ނުކުރާ ދުވަހާ ގުޅިގެން، ދުންފަތުން ސަލާމަތްވެފައިވާ ދުޅަހެޔޮ މުޖުތަމައެއް ބިނާކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ގޮވާލައްވައިފިއެވެ.
މި ދުވަހުގެ މުނާސަބަތުގައި ރައީސް ފޮނުއްވި ހާއްސަ މެސެޖުގައި ވިދާޅުވީ، ދުންފަތުގެ ސަބަބުން ކުރިމަތިވާ ސިއްހީ، އިޖުތިމާއީ އަދި އިގުތިސާދީ މައްސަލަތަކަކީ ގައުމުގެ ތަރައްގީއަށް އޮތް ވަރަށް ބޮޑު ގޮންޖެހުމެއް ކަމަށެވެ. މި ވަބާއިން އަންނަން އޮތް ޖީލުތައް ސަލާމަތްކުރުމަށްޓަކައި، އީ-ސިނގިރޭޓު މަނާކުރުމާއި 2025 ވަނަ އަހަރު ތަންފީޒުކުރި "ޓޮބޭކޯ-ފްރީ ޖެނެރޭޝަނަލް ބޭން" ފަދަ ހަރުދަނާ ފިޔަވަޅުތަކެއް ސަރުކާރުން މިހާރުވެސް އަޅާފައިވާކަން އެމަނިކުފާނު ވަނީ ފާހަގަކުރައްވާފައެވެ. އަދި ދުންފަތް ހުއްޓާލަން ބޭނުންވާ ފަރާތްތަކަށް ދެވޭ ފަރުވާގެ ހިދުމަތްތައް ފުޅާކުރެވިފައިވާކަންވެސް އެ މެސެޖުގައި ބަޔާންކުރެއްވިއެވެ.
މީގެ އިތުރުން، ޒުވާނުންނަށް އަމާޒުކޮށްގެން ފްލޭވާޑް ނިކޮޓީން ޕައުޗްތައް މާކެޓުކުރުމާއި، އާޓިފިޝަލް އިންޓެލިޖެންސް (އޭއައި) ބޭނުންކޮށްގެން ކުރާ އިޝްތިހާރުތަކަށް އިތުރަށް ސަމާލުވެ އެކަންކަމާ ދެކޮޅަށް މަސައްކަތްކުރުމަށް ރައީސް އިލްތިމާސްކުރެއްވިއެވެ. އަދި ކުރިމަގުގައި ދުންފަތް ކޮންޓްރޯލްކުރުމުގެ ގާނޫނުތަކާއި ގަވާއިދުތައް އިތުރަށް ހަރުދަނާކޮށް، ދުންފަތުން ނަގާ ޓެކްސް ބޮޑުކުރުމަށް ސަރުކާރުން މަސައްކަތްކުރާނެކަމުގެ ޔަގީންކަންވެސް އެމަނިކުފާނު ވަނީ ދެއްވާފައެވެ.
ކޮމެންޓު ފޮނުވާ