އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ދިން އާ އިންޒާރުތަކާ ގުޅިގެން ބިރުވެރިކަން އުފެދި، ލުބުނާނުގެ ވެރިރަށް ބެއިރޫތުގެ ދެކުނުގެ ސަރަޙައްދުތަކުގައި ދިރިއުޅޭ އާންމު ރައްޔިތުންނާއި އާއިލާތައް އެ ސަރަޙައްދު ދޫކޮށް ރައްކާތެރި ހިސާބުތަކަށް ދާން ފަށައިފިކަމަށް އަލްޖަޒީރާ އެރެބިކްގެ ނޫސްވެރިން ރިޕޯޓުކޮށްފިއެވެ.
ހޯމަ ދުވަހު އާންމުކުރި ވީޑިއޯ މެސެޖެއްގައި ނަތަންޔާހޫ ވަނީ ހިޒްބުﷲ އާ ދެކޮޅަށް ދެމުންދާ ހަމަލާތައް މަޑުޖައްސާނުލާނެކަން ހާމަކޮށްފައެވެ. "އަހަރެމެން މިދަނީ ފަހަތަކަށް ނޫން، އޭގެ ބަދަލުގައި އަހަރެން އަންގާފައިވާނީ ހަމަލާތައް އިތުރަށް ވަރުގަދަކުރުމަށް،" ކަމަށް އޭނާ ބުންޏެވެ. މި އިންޒާރު ދީފައިވަނީ އިސްރާއީލުގެ އަސްކަރިއްޔާއިން ލުބުނާނުގެ ދެކުނަށާއި އިރުމަތީ ބެކާ ވެލީ ސަރަޙައްދަށް އަމާޒުކޮށް ވަރުގަދަ ވައިގެ ހަމަލާތަކެއް ދެމުންދާ ދަނޑިވަޅެއްގައެވެ.
ބެއިރޫތުގެ ދެކުނުގެ ސަރަޙައްދުތަކަކީ ހިޒްބުﷲގެ ނުފޫޒު ބޮޑު ސަރަޙައްދުތަކަކަށް ވުމާއެކު، އިސްރާއީލުން އެ ސަރަޙައްދުތަކަށް އަމާޒުކޮށް ކުއްލި ބޮމުގެ ހަމަލާތަކެއް ދީފާނެކަމުގެ ބިރު ވަނީ އާންމުންގެ މެދުގައި ވަރަށް ބޮޑަށް އުފެދިފައެވެ. މީގެ ސަބަބުން މަގުތަކުގައި ޓްރެފިކް ތޮއްޖެހުން ބޮޑުވެ، ގިނަ ބަޔަކު ދަނީ އެމީހުންގެ ގެދޮރާއި މުދާ ދޫކޮށް، ސަލާމަތްތެރިކަން ހޯދުމަށްޓަކައި އެހެން ސަރަޙައްދުތަކަށް ދަތުރުކުރަމުންނެވެ.
އިސްރާއީލުން ލުބުނާނަށް ދެމުންދާ ހަމަލާތައް ފުޅާކޮށްފައިވާއިރު، މިކަމުގެ ސަބަބުން ލުބުނާނުގައި ބޮޑު އިންސާނީ ކާރިސާއެއް އުފެދިދާނެކަމުގެ ކަންބޮޑުވުން ވަނީ އިތުރުވެފައެވެ. އަދި ދެ ފަރާތުގެ ދެމެދުގައި ހިނގަމުންދާ މި ކުރިމަތިލުންތައް އިތުރަށް ގޯސްވެ، މުޅި ސަރަޙައްދަށް ހަނގުރާމަ ފުޅާވެދާނެކަމުގެ ބިރު ބައިނަލްއަޤްވާމީ މުޖުތަމަޢުއިންވެސް ދަނީ ފާޅުކުރަމުންނެވެ.
ކޮމެންޓު ފޮނުވާ