ގައުމީ އެއާލައިން، މޯލްޑިވިއަން އިން އޮސްޓްރޭލިއާގެ މެލްބަން އާއި ރާއްޖެއާ ދެމެދު ކުރާ ސީދާ ދަތުރުތައް މިއަދު ރަސްމީކޮށް ފަށައިފިއެވެ. މިއީ މި ދެ ގައުމުގެ ދެމެދުގައި ސީދާ ދަތުރުތައް ފެށި ފުރަތަމަ ފަހަރެވެ.
މި ތާރީޚީ ދަތުރުތައް ފެށުމުގެ ގޮތުން މޯލްޑިވިއަންގެ އޭ330 މަރުކާގެ ބޯޓެއް މިހާރު ފުރާފައިވާއިރު، މިއީ ރާއްޖޭގެ ވައިގެ ދަތުރުފަތުރުގެ ސިނާއަތަށް ލިބުނު ވަރަށް ބޮޑު ކުރިއެރުމެއް ކަމަށް އެ ކުންފުނިން ސިފަކުރެއެވެ. މީގެ ކުރިން އޮސްޓްރޭލިއާ އާއި ރާއްޖެއާ ދެމެދު ޓްރާންސިޓްކޮށް ދަތުރުކުރަން ޖެހުނު ނަމަވެސް، އަލަށް މި ފެށުނު ޚިދުމަތާއެކު ދަތުރުވެރިންނަށް ބޮޑެތި ލުއިފަސޭހަތަކެއް ލިބިގެންދާނެއެވެ. ޚާއްސަކޮށް އޮސްޓްރޭލިއާގެ ފަތުރުވެރިން އެންމެ ގިނައިން ރާއްޖެ ޒިޔާރަތްކުރާ ދުވަސްވަރާ ދިމާކޮށް މި ދަތުރުތައް ފެށުމަކީ ފަތުރުވެރިކަމަށް ލިބޭނެ ވަރަށް ބޮޑު ކުރިއެރުމެކެވެ.
މި ދަތުރުތައް ފެށުމަށްޓަކައި ގާނޫނީ ގޮތުން ފުރިހަމަކުރަންޖެހޭ ކަންކަން ނިންމައި، ދެ ގައުމުގެ އޭވިއޭޝަން އޮތޯރިޓީތަކުގެ މެދުގައި މުހިންމު އެއްބަސްވުމެއްގައި މިއަހަރުގެ މާރިޗު 19 ވަނަ ދުވަހު ވަނީ ސޮއިކޮށްފައެވެ. ޓްރާންސްޕޯޓް މިނިސްޓަރު މުޙައްމަދު އަމީން ފާހަގަކުރެއްވި ގޮތުގައި މި އެއްބަސްވުމުގެ ދަށުން ދެ ގައުމުގެ ދެމެދުގައި އެއާލައިންތަކަށް ދަތުރުކުރުމުގައި އޮތް ހުރިހާ ހުރަސްތަކެއް މިހާރު ވަނީ ނައްތާލެވިފައެވެ.
މިދިޔަ އަހަރުގެ ޑިސެމްބަރު މަހުގެ 25 ގައި އިއުލާނުކުރި މި ދަތުރުތަކުގެ ސަބަބުން، އޮސްޓްރޭލިއާގެ ފަތުރުވެރިންނަށް އެއްވެސް މަޑުކުރުމެއް ނެތި ސީދާ ރާއްޖެ އައިސް އެތެރޭގެ އުދުހުންތަކާ ގުޅާލުމަށް މަގުފަހިވާނެއެވެ. އަދި މިއާއެކު ދެ ގައުމުގެ ދެމެދުގައި އޮންނަ ގުޅުން އިތުރަށް ބަދަހިވެ، ވިޔަފާރިއާއި ފަތުރުވެރިކަމުގެ ދާއިރާއިން އައު ފުރުސަތުތަކެއް ހުޅުވިގެންދާނެ ކަމަށް ސަރުކާރާއި ގައުމީ އެއާލައިނުން އުންމީދުކުރެއެވެ.
ކޮމެންޓު ފޮނުވާ