އަދަދު ނޫހުން ގެނެސްދިން "އައިޝާ" ޑޮކިއުމެންޓަރީއާ ގުޅިގެން ފުލުހުން ކުރިއަށްގެންދާ ޖިނާއީ ތަހުގީގަށް، ސަރުކާރުގެ ކުރީގެ އޮފިޝަލް އީޝާ އަޝްރަފް މިއަދު ހެންވޭރު ޕޮލިސް ސްޓޭޝަނަށް ހާޒިރުކޮށްފިއެވެ.
އީޝާއަކީ މި ސަރުކާރުގެ ފުރަތަމަ ދުވަސްވަރު ރައީސް އޮފީހުގެ އިތުރުން ދެ ވުޒާރާއެއްގެ ސިޔާސީ މަގާމުތައް ފުރުއްވުމަށްފަހު ވަޒީފާއިން ވަކިކޮށްފައިވާ ފަރާތެކެވެ. ފުލުހުން އޭނާގެ މައްޗަށް ތުހުމަތުކުރަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒަށް ނިސްބަތްކޮށް ހަދާފައިވާ މި ޑޮކިއުމެންޓަރީ އުފެއްދުމުގައި އަމަލީގޮތުން ބައިވެރިވި ކަމަށެވެ. މީގެ ކުރިން އަންގާރަ ދުވަހުގެ ރޭ ވެސް ފުލުހުން އޭނާއާ ސުވާލުކޮށްފައިވާއިރު، މިއަދު އޭނާ ހާޒިރުކުރީ އޭނާގެ އެދުމަށް އެރޭ މެދުކަނޑާލި ސެޝަން އަލުން ކުރިއަށް ގެންދިއުމަށެވެ.
އީޝާގެ ގާނޫނީ ވަކީލުންގެ ގޮތުގައި ހަރަކާތްތެރިވެވަޑައިގަންނަވަނީ ކުރީގެ ޕްރޮސެކިއުޓާ ޖެނެރަލް ހުސައިން ޝަމީމާއި ވަކީލު މުހައްމަދު ފަރީދެވެ. ޝަމީމް ވިދާޅުވީ މި މައްސަލައިގައި އީޝާއަކީ ކުށްވެރިއެއް ނޫން ކަމަށާއި އޭނާއަކީ "ވިކްޓިމް" އެއް ކަމަށެވެ. އަދި ތަހުގީގަށް ފުރިހަމައަށް އެއްބާރުލުން ދެއްވާނެކަމުގެ ޔަގީންކަން ދެއްވަމުން، ކަން ހިނގައިދިޔަ ގޮތް ފުލުހުންނަށް ކިޔައިދެމުންދާކަމަށް ވިދާޅުވިއެވެ. ވަކީލު ފަރީދު ފާހަގަކުރެއްވި ގޮތުގައި ފުލުހުންގެ އަތުގައި ހެކި ހުރިކަމަށް ބުނި ނަމަވެސް އެއީ ކޮން ބާވަތެއްގެ ހެއްކެއްކަން އަދި ސާފުކޮށްދީފައެއް ނުވެއެވެ. މީގެ އިތުރުން، މިއީ ޕްރޮފެޝަނަލް މާހައުލެއްގައި ހިނގައިގެންވާނެ ފަދަ ކަންތައްތަކެއް ނޫންކަމަށް ޝަމީމް ވިދާޅުވިއެވެ.
މާޗު މަހުގެ ފަހުކޮޅު އާންމުކުރި މި ޑޮކިއުމެންޓަރީގެ މައްސަލަ ފުލުހުން ބަލަމުންދަނީ ގާނޫނުލްއުގޫބާތުގެ ދަށުން ގަޒްފުކުރުމުގެ ކުށުގެ ތުހުމަތުގައެވެ. ރައީސް މުއިއްޒު ވަނީ އެ ޑޮކިއުމެންޓަރީގައިވާ ވާހަކަތަކަކީ ކަނޑައެޅިގެން ދޮގު ކަމަށް ވިދާޅުވެ، އެކަން ފެތުރި ފަރާތްތަކާމެދު ފިޔަވަޅު އެޅުމަށް ގޮވާލައްވާފައެވެ. މި މައްސަލައިގެ ތަހުގީގަށް ކޯޓު އަމުރެއްގެ ދަށުން އަދަދު ނޫހުގެ އޮފީސް ފާސްކޮށް ބައެއް އިލެކްޓްރޯނިކް ސާމާނު ހިފަހައްޓާފައިވާއިރު، އީޝާގެ އިތުރުން އަދަދު ނޫހުގެ ސީއީއޯ ހުސައިން ފިޔާޒް މޫސާއާއި އެޑިޓަރު ހަސަން މުހައްމަދުގެ ޕާސްޕޯޓު ވެސް ފުލުހުން ވަނީ ހިފަހައްޓާފައެވެ.
ކޮމެންޓު ފޮނުވާ