ދިވެހިރާއްޖެއާއި ސްރީލަންކާއާ ދެމެދު މުހިންމު ހަތް ދާއިރާއަކުން ގުޅުން ބަދަހިކުރުމުގެ އެއްބަސްވުންތަކެއްގައި މިއަދު ސޮއިކޮށްފިއެވެ.
ލަންކާގެ ރައީސް އަނޫރާ ކުމާރާ ޑިސަނާޔަކެގެ ދައުވަތަކަށް ރައީސް ޑރ. މުހައްމަދު މުއިއްޒު އެ ގައުމަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން ދެ ބޭފުޅުން ވަނީ ވަރަށް އުފެއްދުންތެރި މަޝްވަރާތަކެއް ކުރައްވާފައެވެ. މިގޮތުން ދެ ގައުމު ގުޅިގެން ކުރިއަށް ދިއުމަށް ސޮއިކުރެވުނު އެއްބަސްވުންތަކުގެ ތެރޭގައި ވިޔަފާރިއާއި، އިންވެސްޓްމަންޓާއި، ސިއްހީ ދާއިރާގެ އިތުރުން ދިފާއީ އަދި ސަލާމަތީ ކަންކަމާއި، ތައުލީމާއި، ކުޅިވަރާއި، މަސްވެރިކަމާއި، ތިމާވެށި އަދި އިޖުތިމާއީ ތަރައްގީއާ ގުޅޭ ކަންކަން ހިމެނެއެވެ. ގުޅިފައިވާ ބަޔާނުގައި ވާހަކަފުޅު ދައްކަވަމުން ރައީސް މުއިއްޒު ވިދާޅުވީ މި އެއްބަސްވުންތަކުގެ ސަބަބުން ދެ ގައުމުގެ ރައްޔިތުންނަށް އޭގެ ހަގީގީ މަންފާއާއި ފައިދާ ލިބިގެންދާނެ ކަމަށެވެ.
މީގެ އިތުރުން، އިންވެސްޓަރުންނަށް ފަހި މާހައުލެއް ގާއިމުކުރުމާއި ވިޔަފާރީގެ އާ ފުރުސަތުތައް ތަނަވަސްކުރުމާ ގުޅޭގޮތުންވެސް ދެ ގައުމުގެ އެންމެ އިސްވެރިން ވަނީ މަޝްވަރާކުރައްވާފައެވެ. ދިވެހި މަސްވެރިކަމުގެ އުފެއްދުންތަކަށް ލަންކާގެ މާކެޓުން ޖާގަ ހޯދުމުގެ މަސައްކަތް ކުރެވެމުންދާކަން ފާހަގަކުރައްވައި ރައީސް ވިދާޅުވީ، މާދަމާ ލަންކާގައި ބޭއްވުމަށް ހަމަޖެހިފައިވާ ބިޒްނަސް ފޯރަމަކީ ދެ ގައުމުގެ ވިޔަފާރީގެ ގުޅުން އިތުރަށް ހަރުދަނާކޮށް، ރާއްޖޭގައި ހުރި އިންވެސްޓްމަންޓް ފުރުސަތުތައް އަންގައިދޭނެ މުހިންމު މަގެއް ކަމަށެވެ. އަދި މީގެ ސަބަބުން ދެ ގައުމުގެ އިގުތިސާދީ ގުޅުން އެއްހަމަވެ، ހަމަހަމަ ފުރުސަތުތަކެއް ފަހިވެގެންދާނެކަމަށް އުއްމީދުކުރައްވާ ކަމަށްވެސް އެމަނިކުފާނު ވިދާޅުވިއެވެ.
މޫސުމީ ބަދަލުތަކުގެ ސަބަބުން ދެ ގައުމަށްވެސް ކުރިމަތިވެފައިވާ ނުރައްކާތަކަށް އަލިއަޅުއްވާލައްވައި، ބައިނަލްއަގުވާމީ މައިދާނުގައި މިކަމަށް އެކުގައި ވަކާލާތު ކުރުމަށާއި ގުޅިގެން މަސައްކަތްކުރުމަށްވެސް ދެ ގައުމުން ވަނީ އެއްބަސްވެފައެވެ. ރައީސް މުއިއްޒު ސިފަކުރެއްވި ގޮތުގައި މިއަދަކީ ރާއްޖެއާއި ލަންކާގެ ގުޅުމުގެ މުޅިން އާ ބާބެއް ފެށިގެންދިޔަ ދުވަހެކެވެ. އަދި ދިވެހިރާއްޖެ އަބަދުވެސް ދެމިއޮންނާނީ މި ގުޅުން އިތުރަށް ބަދަހިކޮށް، ގުޅިގެން ކުރެވޭ މަސައްކަތްތަކުން ހަގީގީ ނަތީޖާ ނެރެ ރައްޔިތުންނަށް ކުރިއެރުން ހޯދައިދިނުމުގައި ކަމުގެ ޔަގީންކަން އެމަނިކުފާނު ވަނީ ދެއްވާފައެވެ.
ކޮމެންޓު ފޮނުވާ