މާލެ ސިޓީ ކައުންސިލަށް އަލަށް އިންތިހާބުވި ކައުންސިލަރުން މަގާމުގެ ހުވާކުރުމަށް ބާއްވާ ހާއްސަ ރަސްމިއްޔާތު ސޯޝަލް ސެންޓަރުގައި ބޭއްވުމަށް އެ ކައުންސިލުން ނިންމައިފިއެވެ.
ސިޓީ ކައުންސިލުން މައުލޫމާތު ދޭގޮތުގައި، މި ރަސްމިއްޔާތު ސޯޝަލް ސެންޓަރު ފަދަ ޖާގަ ތަނަވަސް ތަނެއްގައި ބާއްވަން ނިންމީ ވީހާވެސް ގިނަ ރައްޔިތުންނަށް މި ހަރަކާތުގައި ބައިވެރިވުމުގެ ފުރުސަތު ފަހިކޮށްދިނުމުގެ ބޭނުމުގައެވެ. މިދިޔަ މަހުގެ ހަތަރު ވަނަ ދުވަހު ބޭއްވި ލޯކަލް ކައުންސިލް އިންތިހާބު ކާމިޔާބުކުރެއްވި ބޭފުޅުން ހުވާކުރުމަށް ހަމަޖެހިފައިވަނީ މި މަހުގެ 17 ވަނަ ދުވަހުއެވެ. މި ހަފްލާއަށް ދައުލަތުގެ އިސްވެރިންނާއި، ރާއްޖޭގައި ތިއްބަވާ ބޭރު ގައުމުތަކުގެ ސަފީރުންގެ އިތުރުން ސިޔާސީ ޕާޓީތަކުގެ އިސް ފަރާތްތަކަށް ދައުވަތު އެރުވުމަށް ވަނީ ހަމަޖެހިފައެވެ.
ލޯކަލް ގަވަމެންޓް އޮތޯރިޓީ (އެލްޖީއޭ) ގެ ލަފާގެ މަތިން މި ރަސްމިއްޔާތުގެ ކަންކަން އިންތިޒާމު ކުރާނީ ކައުންސިލްގެ ސެކްރެޓަރީ ޖެނެރަލެވެ. އެލްޖީއޭ އިން ކަނޑައަޅާފައިވާ އުސޫލުތަކާ އެއްގޮތަށް، މި މަހުގެ 10 ވަނަ ދުވަހުން ފެށިގެން މި ރަސްމިއްޔާތުގެ މައުލޫމާތު އާންމުކޮށް އިއުލާން ކުރަންޖެހޭނެއެވެ. އަދި ހުވާލައިދިނުމަށް ފަނޑިޔާރަކަށް ހާޒިރުނުވެވޭ ފަދަ ހާލަތެއް މެދުވެރިވެއްޖެނަމަ އޮންލައިންކޮށް އެކަން ކުރިއަށް ގެންދިއުމުގެ ފުރުސަތުވެސް ވަނީ ފަހިކޮށްދީފައެވެ. ހުވާކުރުން ކުރިއަށްދާނެ ސީދާ ވަގުތުތައް މި ހަފުތާ ތެރޭގައި އެލްޖީއޭއިން ފައިނަލްކޮށް ހުރިހާ ކައުންސިލްތަކަށް އަންގާނެއެވެ.
ކޮމެންޓު ފޮނުވާ