މާލޭގެ ރަސްފަންނު ސަރަޙައްދު އިތުރަށް ތަރައްޤީކޮށް މަރާމާތުކުރުމުގެ އަމަލީ މަސައްކަތް ފެށުމާ ގުޅިގެން، އެ ސަރަޙައްދު ވަގުތީގޮތުން ބަންދުކޮށްފިއެވެ.
އިންފްރާސްޓްރަކްޗަރ މިނިސްޓްރީން މަޢުލޫމާތު ދެއްވާގޮތުގައި، އިއްޔެ ފެށި މި މަރާމާތުގެ މަސައްކަތް ކުރިއަށްދާ މުއްދަތުގައި، މަސައްކަތް ހިނގާ ސަރަޙައްދުތައް އާންމުންނަށް ނުވަދެވޭނެހެން ބަންދުކުރަމުން ގެންދާނެއެވެ. ރަސްފަންނު މިހާރަށްވުރެ ފުރިހަމައަށް ތަރައްޤީކުރުމަކީ 2025 ވަނަ އަހަރުގެ ފެބްރުއަރީ މަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާންކުރައްވާފައިވާ މުހިންމު މަޝްރޫޢެކެވެ.
މި މަޝްރޫޢުގެ މަސައްކަތްތައް ބަހާލައިގެން ކުރިއަށްގެންދަނީ އެމްޓީސީސީ އާއި އެމްޑަބްލިއުއެސްސީއާ ޙަވާލުކޮށްގެންނެވެ. އެގޮތުން އެމްޓީސީސީން ކުރިއަށްގެންދާ މައިގަނޑު މަސައްކަތްތަކުގެ ތެރޭގައި، ރަސްފަންނު ގޮނޑުދޮށް ގިރުމުގެ މައްސަލައަށް ދާއިމީ ޙައްލެއް ހޯދުމާއި، ބޭރު ތޮށީގެ ބައެއް ބަދަލުކުރުމުގެ އިތުރުން މޫދަށް އެރޭ ސަރަޙައްދުގައި ފެން ދައުރުވާ މިންވަރު ރަނގަޅުކުރުން ހިމެނެއެވެ. އަދި އެ ސަރަޙައްދުގައި ފެން ހިންދާ ރަނގަޅު ނިޒާމެއް ޤާއިމުކުރުމަކީވެސް އެ ކުންފުނީގެ ޒިންމާއެކެވެ.
މީގެ އިތުރުން، އާންމުންނަށް ބޭނުންވާނެ އަސާސީ ވަސީލަތްތައް ޤާއިމުކުރުމުގެ މަސައްކަތް ކުރިއަށްގެންދާނީ އެމްޑަބްލިއުއެސްސީންނެވެ. ހައުސިންގ އެންޑް ކޮންސްޓްރަކްޝަން މިނިސްޓްރީން ހާމަކޮށްފައިވާ ގޮތުގައި، އެ ކުންފުނިން ކުރާނެ ކަންކަމުގެ ތެރޭގައި އާ ފާޚާނާ ބަރިއެއް އިމާރާތްކުރުމާއި، މޫދަށް އެރޭ ފަރާތްތަކަށް ޚާއްޞަ ފެން މާގަނޑުތަކެއް ބެހެއްޓުމާއި، އަދި އާންމުންގެ ތަކެތި ރައްކާކުރެވޭނެ ލޮކަރުގެ ޚިދުމަތް ޤާއިމުކުރުން ހިމެނެއެވެ. މި ބަދަލުތަކާއެކު ރަސްފަންނު ވެގެންދާނީ އާންމުންނަށް އިތުރަށް ހިތްފަސޭހަ އަދި ފުރިހަމަ މަންޒިލަކަށެވެ.
ކޮމެންޓު ފޮނުވާ