ލުބްނާނުގެ ދެކުނުގައި ހިޒްބުﷲ ޖަމާއަތާ ދެކޮޅަށް އިސްރާއީލުން ހިންގަމުންދާ އަސްކަރީ އޮޕަރޭޝަންގެ ތެރެއިން، އިސްރާއީލު ސިފައިންގެ ހަތަރު މީހަކު މަރުވެ އިތުރު ދެ މީހަކަށް ބޮޑެތި އަނިޔާތަކެއް ލިބިއްޖެއެވެ.
އިސްރާއީލުގެ ދިފާއީ ބާރުތައް (އައިޑީއެފް) އިން ހާމަކޮށްފައިވާ ގޮތުގައި، މި ހާދިސާގައި މަރުވެފައިވަނީ ނަހަލް ބްރިގޭޑްގެ ރިކޮނައިސަންސް ޔުނިޓަށް ނިސްބަތްވާ ހަތަރު ސިފައިންނެވެ. އެއީ ސްޑެރޯޓްގެ ކެޕްޓަން ނޯމް މަދްމޯނީ (22އ) އާއި، ލެހަވިމްގެ ސްޓާފް ސާޖަންޓް ބެން ކޯހެން (21އ) އާއި، ބެޓް ޔާމްގެ ސްޓާފް ސާޖަންޓް މެކްސިމް އެންޓިސް (21އ) ގެ އިތުރުން މޮޑިންގެ ސްޓާފް ސާޖަންޓް ގިލާޑް ހަރެލް (21އ) އެވެ. މީގެ އިތުރުން، މި ކުރިމަތިލުމުގައި އިތުރު ސިފައިންގެ މީހަކަށާއި ރިޒާވް ސިފައިންގެ މީހަކަށް ވަރަށް ސީރިއަސް އަނިޔާތަކެއް ލިބިފައިވާ ކަމަށް 'ޓައިމްސް އޮފް އިސްރާއީލް' އިން ރިޕޯޓުކޮށްފައިވެއެވެ.
އައިޑީއެފްގެ ތަހުގީގުން ދައްކާ ގޮތުގައި މި ނުރައްކާތެރި ހާދިސާ ހިނގާފައިވަނީ އިއްޔެ އިރުއޮއްސި 6:30 ހާއިރު ލުބްނާނުގެ ހުޅަނގު ސެކްޓަރުގައެވެ. މި ކުރިމަތިލުން ހިނގާފައިވަނީ ހަތިޔާރު އެޅި ހިޒްބުﷲގެ ހަނގުރާމަވެރިންތަކެއް ފެނިގެން އިސްރާއީލުގެ ނަހަލް ރިކޮނައިސަންސް ޔުނިޓުގެ ސިފައިން ހަރަކާތްތެރިވުމުގެ ތެރޭގައި ދެފަރާތުގެ ދެމެދުގައި ވަރަށް ކައިރިން ބަދަލުކުރެވުނު ބަޑީގެ ހަމަލާތަކެއްގައެވެ. މިއީ ލުބްނާނުގެ ދެކުނުގައި އިސްރާއީލުން ފަށާފައިވާ އެއްގަމު އޮޕަރޭޝަންގައި އެގައުމުގެ ސިފައިންނަށް މިހާތަނަށް ކުރިމަތިވި އެންމެ ގެއްލުން ބޮޑު އެއް ހާދިސާއެވެ.
ކޮމެންޓު ފޮނުވާ