ވެލާނާ އިންޓަނޭޝަނަލް އެއަރޕޯޓު (ވީއައިއޭ) ގެ ޓާމިނަލް 2 ބޭނުންކުރާ ފަސިންޖަރުންނަށް ފަސޭހަކޮށްދިނުމުގެ ގޮތުން، އެ ސަރަހައްދުގެ ޓްރެފިކް ފްލޯއަށް މިއަދު ވަނީ މުހިންމު ބަދަލުތަކެއް ގެނެސްފައެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން މައުލޫމާތު ދޭގޮތުގައި، މިއަދު ހެނދުނު 10:00 އިން ފެށިގެން ޓާމިނަލް 2 ގެ ކުރިމަތި ވަނީ ޓެކްސީތަކަށް މީހުން އަރުވައި ބޭލޭނެ ސަރަހައްދެއްގެ ގޮތުގައި ކަނޑައަޅާފައެވެ. މިގޮތުން، އެރައިވަލް ކުރިމަތިން ބުރާ ދެމެދުގައިވާ ސަރަހައްދު ޚާއްސަކޮށްފައިވަނީ ފަސިންޖަރުން ބޭލުމަށެވެ. އެ ސަރަހައްދުގައި އެއްފަހަރާ 4 ޓެކްސީއަށް މަޑުކުރެވޭނެ ސްލޮޓްތައް ފާހަގަކޮށްފައި ހުންނާނެއެވެ.
މީގެ އިތުރުން، ޑިޕާޗަރ ކުރިމަތިން ބުރާ ދެމެދުގައިވާ ސަރަހައްދު ކަނޑައަޅާފައިވަނީ ފަސިންޖަރުން ޓެކްސީއަށް އެރުމަށެވެ. މި ސަރަހައްދުގައި އެއްފަހަރާ 5 ޓެކްސީއަށް މަޑުކުރެވޭނެ އިންތިޒާމު ވަނީ ހަމަޖައްސާފައެވެ. އަލަށް ގެނެވުނު މި ބަދަލުތަކަށް އާންމުންނާއި ޑްރައިވަރުން އަހުލުވެރިކުރުވައި، އެ ސަރަހައްދުގެ ޓްރެފިކް އޮމާންކަމާއެކު މެނޭޖުކުރުމަށްޓަކައި އެމްއޭސީއެލްގެ މުވައްޒަފުން އެތަނުގައި ހަރަކާތްތެރިވަމުން ދާނެކަމަށްވެސް އެ ކުންފުނިން ވަނީ ބުނެފައެވެ.
ކޮމެންޓު ފޮނުވާ