އައްޑޫ ސިޓީގައި ޒަމާނުއްސުރެ ބޮޑުވެފައިވާ ކަރަންޓުގެ މައްސަލައަށް ދާއިމީ ހައްލެއް ހޯދައިދިނުމަށްޓަކައި، އެ ސިޓީގައި އާ އިންޖީނުގެއެއް އެޅުމުގެ ބޮޑު މަޝްރޫއު ފެނަކަ ކޯޕަރޭޝަނުން ދުބާއީގެ ކުންފުންޏަކާ ހަވާލުކޮށްފިއެވެ.
މި މަޝްރޫއުގެ އެއްބަސްވުމުގައި ފެނަކައިގެ ފަރާތުން ސޮއިކުރެއްވީ އެ ކުންފުނީގެ މެނޭޖިންގ ޑިރެކްޓަރު މުހައްމަދު ނަޖާހުއެވެ. އަދި މަސައްކަތާ ހަވާލުވި ދުބާއީގެ 'ޑެފިނިޓް ސޮލިއުޝަންސް' ގެ ފަރާތުން ސޮއިކުރެއްވީ އެ ކުންފުނީގެ ފައުންޑަރު އަދި ސީއީއޯ އަބްދުﷲ ސައީދެވެ. ދައުލަތުގެ މީޑިއާއަށް މައުލޫމާތު ދެމުން ފެނަކައިން ބުނެފައިވާ ގޮތުގައި މިއީ 31 މިލިއަން ޑޮލަރުގެ އަގުހުރި މަޝްރޫއެކެވެ.
މި މަޝްރޫއުގެ ދަށުން އައްޑޫގައި ގާއިމުކުރާނީ 26 މެގަވޮޓްގެ ކަރަންޓު އުފައްދައިދޭ ނިޒާމެކެވެ. އެގޮތުން އާ އިންޖީނުގޭގައި ބަހައްޓާނީ ބެލްޖިއަމްގެ އަންގްލޯ ބެލްޖިއަން ކޯޕަރޭޝަން (އޭބީސީ) ގެ ލޯ ސްޕީޑް ޒަމާނީ އިންޖީނުތަކެކެވެ. މިއީ ޔޫރަޕުގައިވެސް ބޭނުންކުރާ ފެންވަރު ރަނގަޅު ބްރޭންޑެކެވެ. މީގެ ކުރިން އައްޑޫ އިންޖީނުގޭގެ މަސައްކަތް ޗައިނާގެ ޑޮންފަން ކުންފުންޏާ ހަވާލުކުރި ނަމަވެސް، އެ މަސައްކަތް ކުރިއަށް ނުދާތީ އެ އެއްބަސްވުން މިހާރު ވަނީ ބާތިލުކޮށްފައެވެ.
ޕީއެންސީގެ "ދަ ގްރޭޓާ އައްޑޫ" ކެމްޕެއިން އިފްތިތާހުކުރުމަށް ރޭ ބޭއްވި ރަސްމިއްޔާތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ، އަންނަ އަހަރުގެ ޖުލައި މަހުގެ ނިޔަލަށް މި މަޝްރޫއު އެއްކޮށް ނިމި، ކުރިއަށް އޮތް 20 އަހަރަށް އައްޑޫގެ ކަރަންޓުގެ މައްސަލަ ހައްލުވެގެންދާނެކަމުގެ ޔަގީންކަން ދެއްވާފައެވެ. އައްޑޫގެ ގުޅިފައިވާ ރަށްތަކުން ކަރަންޓު ކެނޑުމަކީ އެތައް ސަރުކާރަކަށް ހައްލުނުކުރެވި އޮތް ބޮޑު މައްސަލައަކަށް ވާއިރު، މިފަދަ ތަރައްގީގެ ބޮޑެތި މަޝްރޫއުތަކަށް ހުރަސްއެޅުމުގެ ފުރުސަތު ކައުންސިލްތަކަށް އޮންނާނެތީ، ކުރިއަށް އޮތް ލޯކަލް ކައުންސިލް އިންތިހާބުގައި ސަރުކާރަށް އެއްބާރުލުންދޭނެ މެމްބަރުން ހޮވުމުގެ މުހިންމުކަން އެމަނިކުފާނު ވަނީ ފާހަގަކުރައްވާފައެވެ.
ކޮމެންޓު ފޮނުވާ