އައްޑޫ ސިޓީ ފޭދޫ ބަނދަރުގެ ބޭރުގައި އަޅާފައި އޮތް "މައިނާ ސަފާރީ" ގެ ޑައިވިން ދޯންޏެއްގައި މިއަދު އަލިފާން ރޯވެ، ބޭނުން ނުކުރެވޭ ވަރަށް އަނދައި އަޑިއަށް ހިނގައްޖެއެވެ.
މިއަދު މެންދުރުފަހު ހިނގި މި ހާދިސާގެ ރިޕޯޓު ލިބުމާއެކު، އެމްއެންޑީއެފް ސަދަން އޭރިއާ ކޮމާންޑުގެ ހިތަދޫ ފަޔަރ ސްޓޭޝަންގެ ސިފައިން ވަނީ އަލިފާން ނިއްވުމުގެ މަސައްކަތް ފަށާފައެވެ. ނަމަވެސް ސިފައިން ހަރަކާތްތެރިވަމުން ދަނިކޮށް، މެންދުރުފަހު 3:30 ހާއިރު އެ ދޯނި ވަނީ އެއްކޮށް ކަނޑު އަޑިއަށް ގޮސްފައެވެ.
އަލިފާން ރޯވި ވަގުތު ދޯނީގައި ތިބި މީހުން ވަނީ ކައިރީގައި އޮތް ސަފާރީއަކަށް އަރައި ސަލާމަތްވެފައެވެ. އެމްއެންޑީއެފުން މައުލޫމާތު ދޭ ގޮތުގައި، މި ހާދިސާގައި އެކެއްގެ ފައި ފިހިގެން ފޭދޫ ސިއްހީ މަރުކަޒަށް ގެންގޮސް ފަރުވާ ދީފައިވެއެވެ. އަދި ފަރުވާ ދިނުމަށްފަހު އޭނާ މިހާރު ވަނީ ދޫކޮށްލާފައެވެ.
ފޭދޫ ކައުންސިލަރަކާ ހަވާލާދީ ނޫސްތަކުގައި ރިޕޯޓުކޮށްފައިވާ ގޮތުން، ރަށު ތެރޭގައި ވާހަކަ ދެކެވޭ ގޮތުގައި ދޯނީގައި އަލިފާންގަނޑު ހަލުވިކަމާއެކު ފެތުރިގެން ދިޔައީ ގޭސް ފުޅިއެއް ގޮވުމުގެ ސަބަބުންނެވެ. މި ހާދިސާގައި އެ ދޯނި ވަނީ އެއްވެސް ވަރަކަށް ބޭނުން ނުކުރެވޭ ވަރަށް އަނދާ ހުލިވެފައެވެ.
ކޮމެންޓު ފޮނުވާ