ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން، ރަޝިޔާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތަކަށް ލުއިދީ، އިންޑިއާއިން ރަޝިޔާގެ ތެޔޮ ގަތުމަށް އެމެރިކާއިން ވަގުތީގޮތުން ހުއްދަ ދީފިއެވެ.
އެމެރިކާގެ ޓްރެޒަރީ ޑިޕާޓްމަންޓުން ހާމަކޮށްފައިވާ ގޮތުގައި، ރަޝިޔާއިން ތެޔޮ ގަތުން މަނާކޮށްފައި އޮތް އޮތުން ވަގުތީގޮތުން މަޑުޖައްސާލައި، އެހެން ގައުމުތަކަށް ތެޔޮ ދޫކުރުމުގެ ހުއްދަ އަލުން ދިނުމަށް މިހާރު ވަނީ ނިންމާފައެވެ. މި ނިންމުމާއެކު، އިންޑިއާގެ ތެޔޮ ބޯޓުތަކަށް ރަޝިޔާއިން ތެޔޮ ބަރުކުރުމުގެ މަސައްކަތް އަލުން ފެށިގެންދާނެ ކަމަށް ވަނީ ބުނެފައެވެ.
ކުރިން އިންޑިއާއިން ރަޝިޔާގެ ތެޔޮ ގަތުން ހުއްޓާލާފައިވަނީ، ރަޝިޔާއާއި ޔޫކްރޭނުގެ ހަނގުރާމައާ ގުޅިގެން އެމެރިކާއިން އެޅި ހަރުކަށި ފިޔަވަޅުތަކުގެ ސަބަބުންނެވެ. އެ ފިޔަވަޅުތަކުގެ ދަށުން، ރަޝިޔާއިން ތެޔޮ ގަންނަ ގައުމުތަކުން އެމެރިކާއަށް އެތެރެކުރާ މުދަލުން ނަގާ ޓެރިފް ބޮޑުކުރުމާ ގުޅިގެން އިންޑިއާއަށް ވަނީ މަޖުބޫރީ ހާލަތަކާ ކުރިމަތިލާން ޖެހިފައެވެ.
އެމެރިކާއިން އިންޑިއާއަށް މި ލުއި ދީފައިވަނީ މެދުއިރުމަތީގެ މަސްރަހު ގޯސްވެ، ދުނިޔޭގެ ތެލުގެ ބާޒާރަށް ބޮޑެތި ގޮންޖެހުންތަކަކާ ކުރިމަތިވެފައިވާ ދަނޑިވަޅެއްގައެވެ. ޚާއްޞަކޮށް އެމެރިކާއާއި އިސްރާއީލާ ގުޅިގެން އީރާނަށް ދިން ހަމަލާތަކަށްފަހު، އީރާނުން މެދުއިރުމަތީގައިވާ އެމެރިކާގެ ބޭސްތަކަށް ހަމަލާދީ، ތެޔޮ އުފުލާ މައި މަގުތަކަށް ހުރަސްއެޅުމުގެ ސަބަބުން ބައިނަލްއަގުވާމީ ބާޒާރުގައި ތެޔޮ ލިބުން ދަތިވެ، އަގުތައް ވަނީ ވަރަށް ބޮޑަށް އުފުލިފައެވެ.
ކޮމެންޓު ފޮނުވާ