ކުޑަކުދިންނަށް ޖިންސީ ގޯނާކުރުމާއި ބްލެކްމެއިލް ކުރުމުގެ ކުށް ސާބިތުވެފައިވާ ޖެފްރީ އެޕްސްޓީންއާ ގުޅުން ބޭއްވިކަމަށް ތުހުމަތުކުރެވޭ މައްސަލައިގައި، ކުރީގެ ރައީސް ޑރ. މުހައްމަދު ވަހީދު ހަސަން މަނިކާ ދެކޮޅަށް މައްސަލައެއް ހުށަހަޅައިފިނަމަ އެކަން ތަހުގީގު ކުރައްވާނެ ކަމަށް ދާޚިލީ ސަލާމަތާބެހޭ ވަޒީރު އަލީ އިހުސާން ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު އިހުސާން ވިދާޅުވީ، އެޕްސްޓީންއާ މުޢާމަލާތްކޮށް ގުޅުން ބޭއްވި މައްސަލާގައި ރައީސް ވަހީދުގެ މައްޗަށް ޖިނާއީ ތުހުމަތެއްކޮށް ފުލުހުންގެ މުއައްސަސާއަށް މިހާތަނަށް އެއްވެސް ފަރާތަކުން މައްސަލައެއް ހުށަހަޅާފައި ނުވާކަމަށެވެ. އަދި ފުލުހުން އަމިއްލައަށް އިސްނަގައިގެން ވެސް މިހާތަނަށް އެފަދަ ތަހުގީގެއް ފަށާފައި ނުވާކަމަށް ވަޒީރު ފާހަގަކުރެއްވިއެވެ.
ނަމަވެސް، ޖިނާއީ ކުށެއް ކޮށްފައިވާކަމަށް ގަބޫލުކުރެވޭ ހާލަތެއްގައި ނުވަތަ އެފަދަ މައްސަލައެއް ހުށަހެޅިއްޖެ ހާލަތެއްގައި، ވަކި މީހަކު އިސްތިސްނާ ކުރުމެއް ނެތި އެ މައްސަލައެއް ބައްލަވާނެ ކަމުގެ ޔަގީންކަން ވަޒީރު ދެއްވިއެވެ.
އެޕްސްޓީންއާ ގުޅުން އޮތްކަން ހާމަވާ ލިޔެކިޔުންތަކެއް ލީކުވުމާ ގުޅިގެން، ރައީސުލްޖުމްހޫރިއްޔާގެ ޚާއްސަ މަންދޫބުގެ މަގާމުން ރައީސް ވަހީދު ވަނީ މިދިޔަ ފެބްރުއަރީ މަހުގެ 3 ވަނަ ދުވަހު އިސްތިއުފާ ދެއްވާފައެވެ. ރައީސް ވަހީދު އިސްތިއުފާ ދެއްވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެކަމަށް އެދިވަޑައިގަތުމުން ކަމަށް ރައީސް މުޢިއްޒު ވަނީ ދާދިފަހުން ހާމަކުރައްވާފައެވެ.
މިކަމާ ގުޅިގެން ރައީސް ވަހީދުގެ އޮފީހުން ނެރުނު ބަޔާނެއްގައި ބުނެފައިވަނީ، އެޕްސްޓީންއާ އެކު އޮތީ ހަމައެކަނި ރަސްމީ ގުޅުމެއް ކަމަށާއި، އޭނާ ހިންގި އެއްވެސް ލާިންސާނީ އަމަލެއްގައި ރައީސް ވަހީދު އަދި އެމަނިކުފާނުގެ އާއިލާގެ ބޭފުޅަކުވެސް ބައިވެރިވެވަޑައިގެންފައި ނުވާނެ ކަމަށެވެ. އަދި އެޕްސްޓީންގެ ހަގީގަތް ހާމަވުމުން، އެފަދަ މީހަކާ މުއާމަލާތް ކުރެވުނީތީ ރައީސް ވަހީދު ހިތާމަކުރައްވާ ކަމަށްވެސް އެ ބަޔާނުގައި ވެއެވެ.
ކޮމެންޓު ފޮނުވާ