ދުޅަހެޔޮ ޖީލެއް ބިނާކުރުމުގެ ސިޔާސަތުގެ ދަށުން، ރާއްޖޭގައި ޝީޝާ ބުއިން މަނާކުރުމާއި ހަކުރު އެކުލެވޭ ބާވަތްތަކުން ޓެކްސް ނެގުމުގެ އިތުރުން ހަކުރަށް ދެމުން އަންނަ ސަބްސިޑީ ކަނޑާލުމާ ގުޅޭގޮތުން ސަރުކާރުން މުހިންމު މަޝްވަރާތަކެއް ފަށައިފިއެވެ.
ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ހެލްތު މިނިސްޓަރު އަބްދުﷲ ނާޒިމް އިބްރާހިމް ވިދާޅުވީ، ދުންފަތުގެ އިސްތިއުމާލުކުރުން ހުއްޓުވުމަށް ސަރުކާރުން އަޅަމުންދާ ހަރުދަނާ ފިޔަވަޅުތަކުގެ ތެރެއިން، ވޭޕް މަނާކުރުމާއި ދުންފަތުގެ ޓެކްސް ބޮޑުކުރުމަކީ ފެށުމެއް ކަމަށެވެ. އަދި ޝީޝާ ފަދަ ތަކެތި މަނާކުރުމާއި ހަކުރު ގިނައިން އެކުލެވޭ ބާވަތްތައް ކޮންޓްރޯލް ކުރުމަކީ އާންމުންގެ ދިރިއުޅުމުގެ ވައްޓަފާޅިއާ ސީދާ ގުޅިފައިވާ ކަންކަމަށް ވާތީ، އެކަންކަން ރެގިއުލޭޓް ކުރުމުގެ މަސައްކަތް ވަކި އުސޫލެއްގެ ތެރެއިން ކުރިއަށްދާ ކަމަށް ވަޒީރު ވިދާޅުވިއެވެ.
މިނިސްޓަރު ފާހަގަކުރެއްވި ގޮތުގައި މި ބަދަލުތައް ގެނައުމުގައި އެންމެ މުހިންމު ކަމަކީ ޕަބްލިކް ހެލްތުގެ ނަޒަރަކުން ރައްޔިތުން ހޭލުންތެރިކުރުވައި، ހަރުފަތަކަށް ފަހު ހަރުފަތެއް ގިރާކުރަމުން ގެންދިއުމެވެ. އަދި މުސްތަގުބަލުގައި ހަކުރުގެ މައްސަލައަށް ހައްލެއް ގެނައުމަކީ ކޮންމެހެން ކުރަންޖެހޭ ކަމެއްގެ ގޮތުގައި ސިފަކުރައްވަމުން، އެކަމާ ގުޅޭ މަޝްވަރާތައް އެކި ލެވެލްތަކުގައި ކުރެވެމުންދާ ކަމަށް ނާޒިމް ވިދާޅުވިއެވެ.
ހަކުރުން ޓެކްސް ނެގުމާއި ސަބްސިޑީ ކަނޑާލުމަކީ ހަމައެކަނި ހެލްތު މިނިސްޓްރީއަށް ނިންމޭނެ ކަންކަމަށް ނުވިޔަސް، އާންމު ސިއްހަތުގެ ރައްކާތެރިކަމަށް ބަލާއިރު ސިއްހީ ދާއިރާ އޮތީ އެފަދަ ނިންމުމަކަށް އިންތިޒާރުގައި ކަމަށް ވަޒީރު ވިދާޅުވިއެވެ. ރާއްޖެއަށް އެތެރެކުރާ ކާޑުގެ ބާވަތްތަކުގެ ތެރެއިން ހަކުރަށް ދައުލަތުން މިހާރުވެސް ބޮޑު ސަބްސިޑީއެއް ދެމުންދާކަން ފާހަގަކޮށްލެވެއެވެ.
ސަރުކާރުން ދުންފަތް ކޮންޓްރޯލް ކުރުމަށް އަޅަމުންދާ ފިޔަވަޅުތަކާއި، ޝީޝާ މަނާކުރުމާއި ހަކުރު އެކުލެވޭ ބުއިންތަކުން ޓެކްސް ބޮޑުކުރުމަށް ކުރަމުންދާ މަޝްވަރާތަކަށް މޯލްޑިވްސް މެޑިކަލް އެސޯސިއޭޝަން (ޑޮކްޓަރުންގެ ޖަމިއްޔާ) އިން ވަނީ ފުރިހަމައަށް ތާއީދުކޮށްފައެވެ. ސަރުކާރުން ހާމަކުރި ގޮތުގައި މި ބަދަލުތައް ގެނައުމުގައި ވަގުތާއި ހާލަތަށް ރިއާޔަތްކުރާނެ ކަމަށާއި، މި އަހަރުގެ ތެރޭގައި އެންމެ ބޮޑު އިސްކަމެއް ދޭނީ މިކަންކަމަށް އާންމުން ހޭލުންތެރިކުރުވުމަށެވެ.
ކޮމެންޓު ފޮނުވާ