ޖަލުތަކުގެ ޖާގަ ދަތިވެގެން ދޫވެފައި ތިބި މީހުން އަނބުރާ ގެނައުމަށްޓަކައި، ކުރިއަށް އޮތް ދެ އަހަރު ތެރޭގައި ޖަލުތަކަށް 400 ޖާގަ އިތުރުކުރުމުގެ މަސައްކަތް ފަށާފައިވާކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙުސާން ވިދާޅުވެއްޖެއެވެ.
ވަޒީރު މިކަން ހާމަކުރެއްވީ، ކުރީ ސަރުކާރުން މާލޭ ޖަލާއި ކަސްޓޯޑިއަލް ފެސިލިޓީ އުވާލުމާ ގުޅިގެން ދިމާވި މައްސަލަތަކަށް އަލިއަޅުވާލައްވަމުންނެވެ. އިޙުސާން ވިދާޅުވި ގޮތުގައި ކުރީ ސަރުކާރުން ވަނީ ރަނގަޅު ފެންވަރަކަށް ހަދާފައި ހުރި 350 މީހުންގެ ޖާގައިގެ މާލޭ ޖަލާއި، 100 މީހުންގެ ޖާގައިގެ ކަސްޓޯޑިއަލް ފެސިލިޓީ މުޅިން އުވާލާފައެވެ. މި ތަންތަން ބަންދުކޮށް، އެތަނުގައި ސްކޫލެއް އެޅުމުގެ ސަބަބުން 450 އެއްހާ މީހުން ބަންދުކުރާނެ ޖާގަ ގެއްލި، ގިނަ އަދަދެއްގެ ކުށްވެރިން މުޖުތަމަޢުއަށް ދޫވެގެން ދިޔަކަމަށް ވަޒީރު ފާހަގަކުރެއްވިއެވެ. މިހާރު ކުރަމުންދާ މަސައްކަތަކީ، ޖާގަ އިތުރުކޮށް މިގޮތަށް ދޫވި މީހުން އަނބުރާ ޖަލަށް ގެނައުމުގެ މަސައްކަތެވެ.
ޖަލުތަކުގެ ޖާގަ އިތުރުކުރުމަށް ކުރެވޭ މަސައްކަތްތަކުގެ ތެރެއިން، ހުޅުމާލެ ޖަލުގައި ޖާގަ ހެދުމުގެ މަސައްކަތް ވަރަށް ޚަރަދު ކުޑަކޮށް ނިންމާލެވިފައިވާކަން ވަޒީރު ފާހަގަކުރެއްވިއެވެ. އެގޮތުން، ކުރިން 39 މިލިއަން ރުފިޔާއަށް ހަވާލުކޮށްފައި އޮތް 100 މީހުންގެ ޖާގައިގެ މަސައްކަތް، ކަރެކްޝަންސްގެ މުވައްޒަފުންގެ އެހީތެރިކަމާއެކު މިދިޔަ 4 މަސް ދުވަހުގެ ތެރޭގައި އެންމެ 5 މިލިއަން ރުފިޔާއަށް ނިންމާލެވިފައިވާކަމަށް ވަޒީރު ވިދާޅުވިއެވެ.
މީގެއިތުރުން، ޖަލުތަކުގެ ސަލާމަތީ ކަންކަން ވަރުގަދަ ކުރުމަށްޓަކައި މާފުށީ ޖަލުގައި ޒަމާނީ ބޮޑީ ސްކޭނަރުތައް ވަނީ ބަހައްޓާފައެވެ. މިއީ ހަށިގަނޑުގެ ކޮންމެ ތަނެއްގައި ފޮރުވައިގެން ތަކެތި އެތެރެކުރަން އުޅުނު ނަމަވެސް އެކަން ދެނެގަނެވޭނެ ނިޒާމެކެވެ. މީގެ ސަބަބުން ޖަލަށް ފޯނާއި މަސްތުވާތަކެތި ވެއްދުން ހުއްޓުވި، ޖަލުތަކުން ހިންގާ ސްކޭމް ކޯލްތަކަށް ބޮޑު ޙައްލެއް ލިބިގެންދާނެކަމަށް ސަރުކާރުން ޤަބޫލުކުރެއެވެ. އަދި ޢާންމުންނަށް ލުއިފަސޭހަ ކުރުމުގެ ގޮތުން ޖަލާ ގުޅުންހުރި ޚިދުމަތްތައް އޮންލައިންކޮށް ހޯދޭނެ ޕޯޓަލްއެއްވެސް މިހާރު ވަނީ ޤާއިމުކޮށްފައެވެ.
އަތޮޅުތެރޭގެ ސަލާމަތީ ކަންކަން ހަރުދަނާކުރުމާ ގުޅޭގޮތުން ވަޒީރު ވިދާޅުވީ، ފުލުހުންގެ ޚިދުމަތް ފުޅާކުރުމަށް 53 އިމާރާތެއްގެ މަސައްކަތް ކުރިއަށްދާ ކަމަށެވެ. މީގެ ތެރެއިން 2 ތަނެއްގެ މަސައްކަތް ނިންމާ ޚިދުމަތް ދޭން ފަށާފައިވާއިރު، މި މަސް ނިމުމުގެ ކުރިން އިތުރު 11 ތަނެއްގެ ޚިދުމަތް ފެށޭނެކަމަށް ވަޒީރު ވިދާޅުވިއެވެ.
ކޮމެންޓު ފޮނުވާ