މި ހިނގާ އަހަރުގެ ފެބުރުއަރީ މަހުގެ 26 ވަނަ ދުވަހުގެ ނިޔަލަށް ދައުލަތަށް ލިބުނު އާމްދަނީ އިތުރުވެ، ޚަރަދުތައް ކެނޑުމަށްފަހު ބަޖެޓް ސާޕްލަސްގެ ގޮތުގައި 1.9 ބިލިއަން ރުފިޔާ ރެކޯޑު ކުރެވިއްޖެއެވެ.
ފިނޭންސް މިނިސްޓްރީން އާންމުކޮށްފައިވާ ދައުލަތުގެ މާލީ ހިސާބުތައް ދައްކާގޮތުން، އަހަރުގެ މިހާތަނަށް ދައުލަތުގެ މާލީ ހާލަތު ހުރީ ވަރަށް ރަނގަޅަށެވެ. ފެބުރުއަރީ މަހުގެ ފަހުކޮޅާ ހަމައަށް އާމްދަނީ އާއި ހިލޭ އެހީގެ ގޮތުގައި ދައުލަތަށް ޖުމްލަ 7.8 ބިލިއަން ރުފިޔާ ލިބިފައިވާއިރު، މި މުއްދަތުގެ ޖުމްލަ ޚަރަދަކީ 5.9 ބިލިއަން ރުފިޔާއެވެ. މިއީ ފާއިތުވި އަހަރުގެ މި މުއްދަތުގައި ލިބުނު 98.2 މިލިއަން ރުފިޔާގެ ސާޕްލަސްއާ އަޅާބަލާއިރު ބޮޑު ކުރިއެރުމެކެވެ.
ތަފާސްހިސާބުތަކަށް ބަލާއިރު މިދިޔަ އަހަރާ އަޅާކިޔާނަމަ ދައުލަތުގެ އާމްދަނީ ވަނީ 29.3 އިންސައްތަ އިތުރުވެފައެވެ. ދައުލަތަށް ލިބުނު އާމްދަނީގެ ބޮޑު ބައެއް، އެއީ 83 އިންސައްތަ ހިއްސާކުރަނީ ޓެކުހުގެ ގޮތުގައި ލިބުނު ފައިސާއިންނެވެ. އާމްދަނީ އިތުރުވުމުގެ މައިގަނޑު ސަބަބަކީ ފަތުރުވެރިކަމުގެ ދާއިރާއިން ނަގާ ޓެކްސް (ޓީޖީއެސްޓީ) އަށް ލިބުނު ކުރިއެރުމެވެ. އެގޮތުން ޓީޖީއެސްޓީގެ ގޮތުގައި 2.3 ބިލިއަން ރުފިޔާ ލިބިފައިވާއިރު، މިއީ މިދިޔަ އަހަރަށްވުރެ 39.4 އިންސައްތައިގެ އިތުރުވުމެކެވެ.
ދައުލަތުގެ ޚަރަދުތަކަށް ބަލާއިރު، ޖުމްލަ ޚަރަދު ހުރީ މިދިޔަ އަހަރާ އެއްވަރެއްގައި ހިފެހެއްޓިފައެވެ. އެހެންނަމަވެސް، ސަރުކާރު މުވައްޒަފުންގެ މުސާރައާއި އިނާޔަތްތަކަށް ހިނގި ޚަރަދު ވަނީ 9.6 އިންސައްތަ އިތުރުވެފައެވެ. މުސާރައާއި ޕެންޝަނަށް 2.64 ބިލިއަން ރުފިޔާ ޚަރަދުވެފައިވާއިރު، ފިނޭންސް މިނިސްޓްރީން ފާހަގަކުރާ ގޮތުގައި މިއީ ޕޭ ހާމަނައިޒޭޝަން ސިޔާސަތުގެ ދަށުން މުސާރަތަކަށް ގެނައި ހެޔޮ ބަދަލުތަކުގެ ނަތީޖާއެވެ.
މާލީ ހާލަތު ރަނގަޅުވުމާއެކު، ސޮވެރިން ޑިވެލޮޕްމަންޓް ފަންޑް (އެސްޑީއެފް) އަށް ޖަމާކުރި ފައިސާގެ އަދަދުވެސް ވަނީ އިތުރުވެފައެވެ. މި މުއްދަތުގައި އެސްޑީއެފްއަށް 287.1 މިލިއަން ރުފިޔާ ޖަމާކޮށްފައިވާއިރު، ބޭރު ފައިސާގެ އާމްދަނީގެ ގޮތުގައި 222.8 މިލިއަން އެމެރިކާ ޑޮލަރު ދައުލަތަށް ވަނީ ލިބިފައެވެ.
ފިނޭންސް މިނިސްޓްރީން ބުނެފައިވާ ގޮތުގައި މިފަހަރުގެ މާލީ ހިސާބުތައް އާންމުކުރުން ލަސްވީ، ދައުލަތުގެ ހިސާބުތައް ބެލެހެއްޓުމުގެ ނިޒާމަށް ގެނައި މުހިންމު ބަދަލުތަކަކާ ގުޅިގެންނެވެ. އޭގެ ތެރޭގައި ޝަރުޢީ ދާއިރާގެ "ސެކްޓޯރަލް ގްރާންޓް" ނިޒާމު ތަޢާރަފުކުރުމާއި، ޒަކާތު ފަންޑަށް ވަކި ލެޖަރ އެކައުންޓެއް ހެދުމުގެ އިތުރުން، އެކައުންޓިންގ ސިސްޓަމް އަލުން ތަރުތީބުކޮށް ރިކައުންސިލް ކުރުމުގެ މަސައްކަތްތައް ހިމެނެއެވެ.
ކޮމެންޓު ފޮނުވާ