މެދުއިރުމަތީގައި ހިނގަމުންދާ ހަނގުރާމައިގެ ސަބަބުން ޔޫއޭއީގައި ތިބި ދިވެހީން ރައްކާތެރި ހިސާބަކަށް ބަދަލުވުމަށް އެއްގަމު މަގުން އޮމާނަށް ދަތުރުކުރުމުގެ ފުރުސަތު އޮތް ނަމަވެސް، އޮމާނަށް އެތެރެވެވޭނީ ވިސާ ނަގައިގެން ކަމަށް ޔޫއޭއީގައި ހުންނަވާ ދިވެހި ސަފީރު މުހައްމަދު ހުސައިން ޝަރީފް (މުންދު) ވިދާޅުވެއްޖެއެވެ.
ޔޫއޭއީގެ ފޮރިން މިނިސްޓަރު ޝައިޚް އަބްދުﷲ ބިން ޒައިދު އަލް ނަހްޔާންއާ ބައްދަލުކުރެއްވުމަށް ފަހު، އެ ގައުމުގައި ތިބި ދިވެހީންނަށް ފޮނުއްވި މެސެޖެއްގައި ސަފީރު ވިދާޅުވީ، ޔޫއޭއީ ދޫކޮށް އެއްގަމު މަގުން އޮމާނަށް ދިޔުމަށް އެ ގައުމުގެ ސަރުކާރުން ހުރަސް ނާޅާ ކަމަށެވެ. ނަމަވެސް އޮމާނަކީ ދިވެހީންނަށް ވިސާއާ ނުލައި އެތެރެވެވޭ ގައުމަކަށް ނުވާތީ، ބޯޑަރު ހުރަސްކުރުމުގެ ކުރިން ވިސާ ހޯދަން ޖެހޭނެކަން ސަފީރު ފާހަގަކުރެއްވިއެވެ. އާންމު ގޮތެއްގައި ދެ ދުވަހެއްގެ ތެރޭގައި ވިސާ ހަމަޖެހޭނެ ކަމަށާއި، ކާރުގައި ދަތުރުކުރާނަމަ އުޅަނދުގެ ލިޔެކިޔުންތައް ވެސް ފުރިހަމަ ކުރަންޖެހޭނެ ކަމަށް ސަފީރު ވިދާޅުވިއެވެ. މީގެ އިތުރުން އެއްގަމު މަގުން އޮމާނަށް ހަތް ގަޑިއިރުން ދެވުނު ނަމަވެސް، ބޯޑަރުގައި ކިޔޫ ދިގުވުމަކީ އެކަށީގެންވާ ކަމެއް ކަމަށް ވެސް ވިދާޅުވިއެވެ.
މި ވަގުތު ޔޫއޭއީގައި އިވެމުންދާ ބާރު އަޑުތަކާ ގުޅޭގޮތުން ސަފީރު ވިދާޅުވީ، އެއީ އެ ގައުމަށް އަމާޒުވާ މިސައިލް ހަމަލާތައް ޑިފެންސް ސިސްޓަމްތަކުން ހުއްޓުވުމުން ގޮވާ އަޑުތައް ކަމަށެވެ. އަދި ބިންމައްޗަށް ވެއްޓެމުންދަނީ އެފަދަ ހަމަލާތަކުގެ ކުނި ނުވަތަ ޑެބްރީ ކަމަށާއި، ހަމަލާތައް އަމާޒުވަމުންދަނީ ވަކި ސަރަހައްދެއް ބަލައިގެން ނޫން ކަމަށް ވެސް ފާހަގަކުރެއްވިއެވެ.
ވައިގެ ދަތުރުތައް މެދުކެނޑި، ނުފުރިފައި ތިބި ފަރާތްތަކަށް ވެސް ލުއި ގޮތްތަކެއް ހަމަޖައްސައިދެމުންދާކަން ސަފީރު ވަނީ ހާމަކުރައްވާފައެވެ. އެގޮތުން އަބޫދާބީގައި ނަމަ، ތާށިވެފައި ތިބި މީހުންނަށް އެ މީހަކު ހުރި ހޮޓަލެއްގައި އިތުރަށް މަޑުކުރެވޭނެ އިންތިޒާމު އެއާލައިންތައް މެދުވެރިކޮށް ހަމަޖައްސައިދެމުންދާ ކަމަށާއި، މުއްދަތު ދިގުލައިގެންދާނަމަ ވައުޗަރު ދޫކުރުމަށް ވެސް ނިންމާފައިވާ ކަމަށް ސަފީރު ވިދާޅުވިއެވެ. މީގެ އިތުރުން ޔޫއޭއީގައި ދިރިއުޅޭ ދިވެހީންގެ ވިސާ ހަމަވެފައިވާނަމަ، ކޮވިޑް ދުވަސްވަރެކޭ އެއްގޮތަށް އޮޓޯއިން ވިސާ އާވާނެ ގޮތް ހަމަޖެހިގެންދާނެ ކަމުގެ ޔަގީންކަން ވެސް ސަފީރު ވަނީ ދެއްވާފައެވެ.
ފާހަގަކޮށްލެވޭ ގޮތުގައި އެމެރިކާއާއި އިސްރާއީލުން އީރާނަށް ދިން ހަމަލާތަކުގެ ރައްދުގައި އީރާނުން ދަނީ ސަރަހައްދީ ގައުމުތަކުގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާ ދެމުންނެވެ. މި ހަމަލާތައް ޔޫއޭއީގެ އިތުރުން ގަތަރު، ބަހްރެއިން އަދި ކުވޭތަށް އަމާޒުވެފައިވާއިރު، ހޮނިހިރު ދުވަހު އެ ސަރަހައްދުގެ ވައިގެ ބަނދަރުތައް ވެސް ވަނީ ބަންދުކޮށްފައެވެ.
ކޮމެންޓު ފޮނުވާ