ކްރިޓިއަން ދީނުގެ އެންމެ އިސް ފާދިރީ، ޕޯޕުގެ ޕާސަނަލް ޑޮކްޓަރު، ފެބްރިޒިއޯ ސޮކޯސީ ކޯވިޑަށް ޕޮޒިޓިވްވެ ކުރިމަތިވި ސިއްޙީ މައްސަލަތަކާ ގުޅިގެން، މަރުވެއްޖެ ކަމަށް، ޕޯޕުގެ ގަޑުވަރު، ވެޓިކަންއިން ނެރޭ ނޫސް، އޮސާވޭޓޯ ރޮމާނޯއިން ބުނެފިއެވެ.
މި ނޫހުން ބުނެފައިވާ ގޮތުގައި، ޕޯޕު ފްރާންސިސް، ސޮކޯސީ އޭނާގެ ޕާސަނަލް ޑޮކްޓަރެއްގެ ގޮތުގައި އިޚްތިޔާރު ކޮށްފައިވަނީ 2015 ވަނަ އަހަރުއެވެ. ކޯވިޑް ބަލީގައި އޭނާ މަރުވެދިޔައިރު، އޭނާގެ އުމުރަކީ 78 އަހަރެވެ.
ކްރިސްޓިއަން ދީނުގެ ފާދިރީންގެ ކޮންފަރެންސް ނޫސް ކަމުގައިވާ އެވެނިއަރގައި ލިޔެފައިވާ ގޮތުގައި ސޮކޯސީ ރޯމްގެ ހޮސްޕިޓަލެއްގައި އެޑްމިޓް ކޮށްފައިވަނީ، ފާއިތުވެދިޔަ ޑިސެމްބަރު މަހުގެ 26 ވަނަ ދުވަހު، ކުރިންވެސް ފަރުވާ ހޯދަމުންދިޔަ، އޭނާގެ ހަށިގަޑުގައި އުފެދިފައިވާ ޓިއުމަރަކަށް ފަރުވާ ކުރުމަށްޓަކައެވެ.
ކޯވިޑް ބަލީގައި ޕޯޕުގެ ޕާސަނަލް ޑޮކްޓަަރު މަރުވެފައިވާއިރު، އެންމެފަހުން އޭނާ ޕޯޕާ ބައްދަލު ކޮށްފައިވަނީ ކޮންއިރަކު ކަމެއް އަދި ސާފުވެފައެއް ނުވެއެވެ.
އާދިއްތަ ދުވަހުގެރޭ ދުރަށް ދެއްކުމަށް ހަމަޖެހިފައިވާ، އިޓަލީގެ ކެނަލް 5 ޓީވީ ޗެނަލްއަށް ޕޯޕު ދެއްވި އިންޓަރވިއުއެއްގައި ވިދާޅުވެފައިވަނީ، އަންނަ ހަފްތާގައި ވެޓިކަންގައި ކޯވިޑް19 ވެކްސިން ދޭން ފަށާނެ ކަމަށާއި އަދި އޭނާވެސް ހުންނެވީ މިވެކްސިން ޖެހުމަށް ތައްޔާރު ވެގެން ކަމުގައެވެ.
ވެޓިކަންގައި ވެކްސިންގެ އަމިއްލަ ޕްރޮގްރާމެއް ފެށުމަށް ތައްޔާރުވަމުން ދާއިރު، އިޓަލީގައި މުޅިން ވަކި ވެރިކަމެއްގެ ގޮތުގައި ވަކިވެފައިއޮންނަ، މިސިޓީ ސަރަހައްތުގައި 450 މީހުން ވަޒީފާ އަދާކުރެއެވެ. މިއެންމެނަށްވެސް ވެކްސިން ދެވޭވަރަށް މިހާރު ވެޓިކަންއިން ވެކްސިން ހޯދާ ތައްޔާރުކޮށްފައިވާ ކަމަށް މީޑިއާތަަކަށް މައުލޫމާތު ދީފައި ވެއެވެ.
ފިޒާ އަދި ބައޯއެންޓެކް އިން އުފެއްދި ފައިޒާ ވެކްސިން އާދަޔާ ޚިލާފު ގަދަ ފިނީގައި ރައްކާކޮށްފައި ބަހައްޓަން ޖެހޭތީވެ، ވެޓިކަންގައި މިހާރުވަނީ މިވެކްސިން ރައްކާކުރެވޭނެ އިންތިޒާމްތައްވެސް ހަމަޖައްސާފައެވެ.
އުމުރުން މިހާރު 84 އަހަރު ވެފައިވާ ޕޯޕު، އިޓަލީގެ ޓީވީ ސްޓޭޝަން ކެނަލް 5އަށް ދެއްވި އިންޓަވިއްގައި ވިދާޅުވެފައިވަނީ، "އަހަރެން ގަބޫލުކުރާ ގޮތުގައި، ހުރިހާ މީހުންވެސް މިވެކްސިން ޖެހުމަކީ، ޒާތީ ގޮތުންނާ އަޚްލާގީ ގޮތުންވެސް ކޮންމެހެން ކުރަންޖެހޭނެ ކަމެއް،" ކަމުގައެވެ.
"މިއީ ހުރިހާ ގޮތަކުންވެސް ކުރަންޖެހޭ ކަމަކަށްވަނީ، މިއީ އަމިލއް ސިއްޙަތާ ގުޅުން ހުރި ކަމަކަށް ވެފައި، އަދި މިއީ، އަނެކުންގެ ސިއްޙަތާވެސް ގުޅުން ހުރި ކަމަކަށް ވާތީ،" ޕޯޕު ވިދާޅުވެފައި ވެއެވެ.
