ދެމެހެއްޓެނިވި ތަރައްޤީއާއި ދުނިޔޭގެ ކުރިއެރުމުގެ އެންމެ މުހިންމު ބިންގަލަކީ ތަޢުލީމު ކަމަށްވާއިރު، މި ސަރުކާރުގެ ފާއިތުވި ދެ އަހަރު ދުވަހުގެ ތެރޭގައި މަތީ ތަޢުލީމު ހާސިލުކުރާ ދަރިވަރުންނަށް ލޯނުގެ ގޮތުގައި އެއް ބިލިއަނަށްވުރެ ގިނަ ރުފިޔާ ދޫކޮށްފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ މިއަދު ފާހަގަކުރަމުންދާ ބައިނަލްއަޤްވާމީ ތަޢުލީމީ ދުވަހާ ގުޅުވައިގެން ސޯޝަލް މީޑިއާގައި ޙިއްސާކުރެއްވި މެސެޖެއްގައެވެ.
ރައީސްގެ މެސެޖުގައި ފާހަގަކުރެއްވި ގޮތުގައި، ތަޢުލީމީ ނިޒާމަކީ އެންމެންގެ ބައިވެރިވުން ހިމެނޭ، އަދި ހެޔޮ ބަދަލުތަކެއް ގެނުވައިދޭ ނިޒާމަކަށް ހެދުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. އަދި ޒުވާނުން ބާރުވެރިކުރުވައި، ޤައުމީ ތަރައްޤީގެ ތަނބެއްގެ ގޮތުގައި ތަޢުލީމު ހެދުމަށް ސަރުކާރުން ވެފައިވާ ވަޢުދުތައް ފުއްދުމަށް ބުރަ މަސައްކަތްތަކެއް ކުރައްވަމުން ގެންދަވާކަން އެމަނިކުފާނު ފާހަގަކުރެއްވިއެވެ.
މަތީ ތަޢުލީމާ ބެހޭ ވުޒާރާގެ ތަފާސްހިސާބުތަކަށް ބަލާއިރު، ދަރިވަރުންނަށް ކިޔެވުމުގެ ފުރުޞަތު ފަހިކޮށްދިނުމަށް ދައުލަތުން ކުރާ ހޭދަ އަހަރުން އަހަރަށް ދަނީ އިތުރުވަމުންނެވެ. މިގޮތުން ވޭތުވެދިޔަ ދެ އަހަރުގެ ތެރޭގައި ޖުމްލަ 1,438 ދަރިވަރުންނަށް ލޯނުގެ އެހީ ހަމަޖައްސައިދީފައިވާއިރު، ހަމައެކަނި 2025 ވަނަ އަހަރުގެ ތެރޭގައިވެސް 596 ދަރިވަރުންނަށް ވަނީ ލޯނު ދޫކޮށްފައެވެ.
ލޯނުގެ އިތުރުން، ސަރުކާރުގެ ހިލޭ ފުރަތަމަ ޑިގްރީއަށް ކިޔަވައިދޭ ސްކީމުގެ ދަށުން ވެސް ގިނަ ދަރިވަރުންތަކެއް އަންނަނީ ތަޢުލީމު ހާސިލުކުރަމުންނެވެ. ރެކޯޑުތަކުން ދައްކާގޮތުގައި މިދިޔަ އަހަރު އެކަނިވެސް މި ސްކީމްގެ ދަށުން 3,286 ދަރިވަރުން ވަނީ ދަސްވެނިވެފައެވެ. އަދި ފާއިތުވި ދެ އަހަރު ތެރޭގައި 5,863 ދަރިވަރުން އަލަށް މި ޕްރޮގްރާމްގައި ރަޖިސްޓްރީވެފައިވާއިރު، އެ ހުރިހާ ދަރިވަރުންނަށް ބޭނުންވާ މާލީ އެހީތެރިކަން ސަރުކާރުން މެދުނުކެނޑި ފޯރުކޮށްދެމުންދާކަން ރައީސް ފާހަގަކުރެއްވިއެވެ.
މި ދުވަހުގެ މުނާސަބަތުގައި ރައީސް ވަނީ، އުނގެނުމަށް މަސައްކަތްކުރާ ކޮންމެ ކުއްޖަކަށްވެސް ކުރިއަށްދިއުމުގެ މަގު ފަހިކޮށްދީ، ޤައުމީ ތަރައްޤީގައި ބައިވެރިވުމުގެ ފުރުޞަތު ހޯދައިދެއްވާނެކަމުގެ ޔަޤީންކަން ދިވެހި ރައްޔިތުންނަށް ދެއްވާފައެވެ.
ކޮމެންޓު ފޮނުވާ