ދިވެހި ބަސް އުނގަންނައިދިނުމާއި އަދަބިއްޔާތުގެ ދާއިރާގައި ފާހަގަކޮށްލެވޭ އަގުހުރި ޚިދުމަތްތަކެއް ކުރެއްވި އާމިނަތު ޙަސަން (އައިންތު މިސް) އަވަހާރަވުމާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ މަރްޙޫމާގެ ޢާއިލާއަށް ތަޢުޒިޔާ ފޮނުއްވައިފިއެވެ. ރައީސުލްޖުމްހޫރިއްޔާ މިއަދު ފޮނުއްވި ތަޢުޒިޔާގެ މެސެޖުގައި، އައިންތު މިސްގެ ވަކިވެދިއުމުގެ ހިތާމައިގައި ބައިވެރިވެވަޑައިގެން، މަރްޙޫމާގެ ޢާއިލާއަށް ކެތްތެރިކަން ދެއްވުން އެދި ދުޢާކުރައްވާފައިވެއެވެ. މީގެ އިތުރުން، ރާއްޖޭގެ ތަޢުލީމީ ދާއިރާއާއި ބަހާއި އަދަބިއްޔާތުގެ ދާއިރާގައި މަސައްކަތްކުރައްވާ އެންމެހާ ބޭފުޅުންނަށްވެސް ރައީސް ވަނީ މި ހިތާމައިގައި ތަޢުޒިޔާ ރައްދުކުރައްވާފައެވެ.
އާމިނަތު ޙަސަނަކީ ދިވެހި ބަހުގެ ޤަވާއިދާއި އަދަބިއްޔާތު އަންނަން އޮތް ޖީލުތަކަށް ވާސިލުކޮށްދިނުމުގައި އިޚްލާސްތެރި މަސައްކަތްތަކެއް ކުރެއްވި ނަމޫނާ ޝަޚްސިއްޔަތެކެވެ. ޚާއްޞަ ގޮތެއްގައި ސްކޫލް މަދަރުސާތަކުގައި ދިވެހި މުދައްރިސެއްގެ ގޮތުގައި ދިގު މުއްދަތަކަށް އޭނާ ކުރެއްވި ޚިދުމަތްތަކަކީ ގިނަ ބަޔަކު ލޯތްބާއި އިޙްތިރާމާއެކު ބަލައިގަންނަ ޚިދުމަތްތަކެކެވެ. ރައީސުލްޖުމްހޫރިއްޔާ ވަނީ މަރްޙޫމާ އާމިނަތު ޙަސަންގެ ފުރާނައަށް މާތްﷲ ރަޙްމަތް ލައްވައި، ސުވަރުގޭގެ މަތިވެރި ނިޢުމަތް މިންވަރުކުރެއްވުން އެދި ދުޢާ ދަންނަވާފައެވެ.
ކޮމެންޓު ފޮނުވާ