ރޯދަ ހަދިޔާގެ މަސްދަޅު ކޭސް ދޫކުރުން ހޮނިހިރު ދުވަހު ފަށަނީ: ކިޔޫގައި ޖެހެން ނުޖެހޭނެ

މި އަހަރުގެ ރޯދަ މަހާ ދިމާކޮށް ސަރުކާރުން ކޮންމެ ގޭބިސީއަކަށް ހަދިޔާކުރުމަށް ނިންމާފައިވާ މަސްދަޅު ކޭސް، އަންނަ ހޮނިހިރު ދުވަހުން ފެށިގެން ދޫކުރަން ފަށާނެކަމަށް ލޯކަލް ގަވަމެންޓް މިނިސްޓަރު އާދަމް ޝަރީފް އުމަރު ހާމަކުރައްވައިފިއެވެ. މިކަމާ ގުޅޭ ތަފްސީލު ހާމަކުރުމަށް ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ، މަސްދަޅު ކޭސްތައް ބެހުމުގެ އިންތިޒާމުތައް މިހާރު ފުރިހަމައަށް ހަމަޖެހިފައިވާ ކަމަށެވެ.

މާލެ ސަރަހައްދުގައި ދިރިއުޅޭ ރައްޔިތުންނަށް ފަސޭހަކަމާއެކު މި ހަދިޔާ ލިބޭނެ އިންތިޒާމު ހަމަޖެއްސުމުގެ ގޮތުން، ކިޔޫގައި ޖެހިގެން ވަގުތު ހޭދަކުރަން ނުޖެހޭނެ ނިޒާމެއް ވަނީ ގާއިމުކޮށްފައެވެ. އެގޮތުން، މިކަމަށް ޚާއްސަ ޕޯޓަލްއެއް މެދުވެރިކޮށް މިއަދު މެންދުރު 12:00 އިން ފެށިގެން އޮންލައިންކޮށް ނަންބަރު ނެގޭނެ ކަމަށް މިނިސްޓަރު ވިދާޅުވިއެވެ. މިއީ ރައްޔިތުންނަށް ތަކުލީފަކާ ނުލައި ޚިދުމަތް ހޯދުމަށް މަގުފަހިކޮށްދިނުމުގެ ގޮތުން އެޅުއްވި ފިޔަވަޅެކެވެ.

މި އަހަރުގެ ރޯދަ ހަދިޔާގެ ގޮތުގައި މުޅި ރާއްޖެއިން ޖުމްލަ 118،673 ގޭބިސީއަކަށް މަސްދަޅު ކޭސް ފޯރުކޮށްދިނުމަށް ވަނީ ހަމަޖެހިފައެވެ. ތަފާސްހިސާބުތައް ދައްކާ ގޮތުން މީގެ ތެރޭގައި ހިމެނެނީ އަތޮޅުތެރޭގެ ރަށްތަކުގެ 56،918 ގޭބިސީއާއި، މާލެ ސަރަހައްދުގެ 61،755 ގޭބިސީއެވެ. މިނިސްޓަރު އާދަމް ޝަރީފް ވަނީ އެއްވެސް ގޭބިސީއެއް ބާކީ ނުކޮށް، ހުރިހާ ފަރާތްތަކަށްވެސް ސަރުކާރުގެ ރޯދަ ހަދިޔާ ލިބޭނެކަމުގެ ފުރިހަމަ ޔަގީންކަން ރައްޔިތުންނަށް ދެއްވާފައެވެ.