ދީނީ ހޭލުންތެރިކަން އިތުރުކޮށް، ތަޢުލީމު ފުޅާކުރުމުގެ ސިޔާސަތުގެ ދަށުން ރާއްޖޭގެ 5 ރަށެއްގައި އިސްލާމީ މަރުކަޒާއި މިސްކިތް އަދި ޤުރުއާން ސެންޓަރު އެޅުމުގެ އެއްބަސްވުމުގައި އިސްލާމީ ކަންތައްތަކާ ބެހޭ ވުޒާރާއިން ސޮއިކޮށްފިއެވެ. މި މަޝްރޫޢުތަކުގެ ދަށުން ޅ. ނައިފަރުގައި 1000 މީހުންގެ ޖާގައިގެ އިސްލާމީ މަރުކަޒެއް އެޅުމަށް ސެންޓްރަލް ލައިން ޕްރައިވެޓް ލިމިޓެޑާ ހަވާލުކުރިއިރު، ހއ. އިހަވަންދޫ އާއި ގއ. ވިލިނގިލީގައި 700 މީހުންގެ ޖާގައިގެ އިސްލާމީ މަރުކަޒު ޤާއިމުކުރުމަށް ވަނީ ފީޑޯ ޕްރައިވެޓް ލިމިޓެޑާއި ކޭ އެންޑް އެފް ހޯލްޑިންގްއާ ހަވާލުކޮށްފައެވެ.
މީގެ އިތުރުން ގއ. ވިލިނގިލީގައި ޤުރުއާން މަރުކަޒެއް ބިނާކުރުމަށް އަފާމީ މޯލްޑިވްސްއާ ހަވާލުކޮށްފައިވާއިރު، ކ. ގުޅީގައި 500 މީހުންގެ ޖާގައިގެ މިސްކިތެއް އެޅުމަށްވެސް ވަނީ އެއްބަސްވެފައެވެ. އަލަށް ޤާއިމުކުރާ މި މަރުކަޒުތަކުގައި އަންހެނުންނާއި ފިރިހެނުންނަށް ނަމާދުކުރެވޭނެ އިންތިޒާމުގެ އިތުރުން، ކްލާސްރޫމްތަކާއި، ލައިބްރަރީ އަދި ކޮންވެންޝަން ހޯލް ފަދަ ޒަމާނީ ވަޞީލަތްތައް ހިމެނޭނެއެވެ. މިއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ރާއްޖޭގެ އެކި ކަންކޮޅުތަކުގައި ދީނީ ޢިލްމު ފެތުރުމަށް ފަހި މާޙައުލެއް ޤާއިމުކުރުމަށް ކުރިއަށްގެންދަވާ މުހިންމު މަސައްކަތްތަކެކެވެ.
ކޮމެންޓު ފޮނުވާ