އިސްރާއީލުން ހިފާފައިވާ އިރުމަތީ ގުދުސްގެ ޝެއިހް ޖައްރާހު އަވަށުގައި ގާއިމުކޮށްފައިވާ އދ. ގެ ރެފިއުޖީންނާ ބެހޭ އޭޖެންސީ (އަންރުވާ) ގެ އިމާރާތްތައް ތަޅާލުމަށް އިސްރާއީލުން ހިންގަމުންދާ އަމަލުތައް ދިވެހި ސަރުކާރުން އެންމެ ހަރުކަށި އިބާރާތުން ކުށްވެރިކޮށްފިއެވެ.
މިކަމާ ގުޅިގެން ފޮރިން މިނިސްޓްރީން ނެރުނު ރަސްމީ ބަޔާނެއްގައި ބުނެފައިވަނީ، އަންރުވާގެ އިމާރާތްތަކަށް ގެއްލުންދީ ތަޅާލުމަކީ ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފު އަމަލެއް ކަމަށެވެ. އަދި މިއީ އދ. އާއި އިންސާނީ އެހީ ފޯރުކޮށްދޭ އެހެނިހެން ޖަމާއަތްތަކުގެ މަސައްކަތްތަކަށް ގަސްތުގައި ހުރަސްއެޅުން ކަމަށާއި، މީގެ ސަބަބުން ފަލަސްތީނުގެ ރައްޔިތުން މިހާރުވެސް ތަހައްމަލުކުރަމުންދާ ވޭނާއި ކެކުޅުން އިތުރަށް ގޯސްވެގެންދާނެ ކަމަށް ސަރުކާރުން ވަނީ ސިފަކޮށްފައެވެ.
ދިވެހި ސަރުކާރުގެ ބަޔާނުގައި އިތުރަށް ފާހަގަކޮށްފައިވާ ގޮތުގައި، އިސްރާއީލުގެ މި އަމަލުތަކަކީ ބައިނަލްއަގުވާމީ އަދުލު އިންސާފާ ބެހޭ ކޯޓު (އައިސީޖޭ) އިން ނިންމާފައިވާ ނިންމުންތަކަށް ވެސް ގޮންޖަހައި ހިންގަމުންދާ ޣައިރު ގާނޫނީ އަމަލުތަކެކެވެ. މި ދަނޑިވަޅުގައި ވެސް، ފަލަސްތީނުގެ ރައްޔިތުންނަށް ބޭނުންވާ އަސާސީ ޚިދުމަތްތަކާއި ރައްކާތެރިކަން ކަށަވަރުކޮށްދިނުމުގައި އަންރުވާ އިން އަދާކުރަމުންދާ މުހިންމު ދައުރު ފާހަގަކޮށް، އެ އެޖެންސީއަށް ދިވެހިރާއްޖެއިން ދެމުންދާ ފުރިހަމަ ތާއީދު ސަރުކާރުން ވަނީ ތަކުރާރުކޮށްފައެވެ.
މީގެއިތުރުން، އިސްރާއީލުން ބައިނަލްއަގުވާމީ ގާނޫނުތަކާ ތަކުރާރުކޮށް ޚިލާފުވަމުންދާ ދިއުން ހުއްޓުވުމަށާއި، އެކަމަށް އިސްރާއީލު ޖަވާބުދާރީ ކުރުވުމަށްޓަކައި ބައިނަލްއަގުވާމީ މުޖުތަމައުން އަޅަންޖެހޭ އަމަލީ ފިޔަވަޅުތައް އެޅުމަށް ވެސް ދިވެހި ސަރުކާރުން ވަނީ ގޮވާލާފައެވެ.
ކޮމެންޓު ފޮނުވާ