ސަރުކާރުގެ ލޯނާއި ސްކޮލަޝިޕްގެ ދަށުން ރާއްޖެއިން ބޭރުގައި ތައުލީމު ހާސިލުކުރަމުންދާ ދަރިވަރުންނަށް ދެމުން އަންނަ ސްޓައިޕެންޑް ނުވަތަ މާލީ އިނާޔަތްތައް މުރާޖައާކުރުމުގެ މަސައްކަތް ފަށާފައިވާ ކަމަށް ހަޔަރ އެޑިއުކޭޝަން މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ. ރައީސުލްޖުމްހޫރިއްޔާގެ އޮފީހުން ގެނެސްދޭ "ތަރުޖަމާނު" ޕްރޮގްރާމުގައި ވާހަކަދައްކަވަމުން މިނިސްޓަރު ފާހަގަކުރެއްވި ގޮތުގައި، ފާއިތުވި ހަތް އަހަރު ދުވަހުގެ ތެރޭގައި ދަރިވަރުންގެ ސްޓައިޕެންޑަށް އެއްވެސް ބަދަލެއް ގެނެސްފައެއް ނުވެއެވެ. ވަކިން ހާއްސަކޮށް ލޯނުގެ ދަށުން ކިޔަވާ ދަރިވަރުންނަށް މާލީ ދަތިތަކާ ކުރިމަތިލާންޖެހޭކަން ފާހަގަކުރައްވައި މިނިސްޓަރު ވިދާޅުވީ، އެކި ގައުމުތަކުގައި ދިރިއުޅުމުގެ ޚަރަދު ތަފާތު ނަމަވެސް، ހުރިހާ ގައުމަކަށް އެއް ހަމައެއްގައި ފައިސާ ދޫކުރަމުން ދިއުމަކީ އޭގެ މައިގަނޑު ސަބަބު ކަމަށެވެ. އެހެންކަމުން މިހާރު ކުރިއަށްދާ މުރާޖައާ ނިމުމުން، އެ ކުއްޖަކު ކިޔަވަން ހުންނަ ގައުމެއްގެ ދިރިއުޅުމުގެ ޚަރަދާ އެކަށޭނަ މިންވަރަކަށް އެލަވަންސް ހަމަޖެހިގެންދާނެ ކަމުގެ ޔަގީންކަން މިނިސްޓަރު ދެއްވިއެވެ.
ދަރިވަރުންގެ ކަންބޮޑުވުންތައް ގާތުން ބެލުމަށާއި ފަސޭހައިން މުއާމަލާތްކުރުމަށްޓަކައި މިނިސްޓްރީން ވަނީ މުހިންމު ފިޔަވަޅުތަކެއް އަޅާފައެވެ. އެގޮތުން 50 ކުދިންނަށްވުރެ ގިނައިން ދިވެހި ދަރިވަރުން ކިޔަވަމުންދާ 5 ގައުމަކާއެކު ވަޓްސްއެޕް މެދުވެރިކޮށް މުއާމަލާތް ކުރެވޭނެ އިންތިޒާމު ހަމަޖައްސާފައިވާއިރު، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އިރުޝާދާއެކު މި ޚިދުމަތް މިހާރު ވަނީ 25 ދަރިވަރުންނަށްވުރެ ގިނަ ކުދިން އުޅޭ ގައުމުތަކަށް ވެސް ފުޅާކޮށްފައެވެ. މީގެ އިތުރުން 1474 ނަންބަރުގެ ކޯލް ސެންޓަރެއް ގާއިމުކޮށްފައިވާއިރު، އީމެއިލް މެދުވެރިކޮށް މުއާމަލާތް ކުރުމަށްވުރެ މި ނިޒާމުތަކުގެ ސަބަބުން ދަރިވަރުންނަށް ދިމާވާ މައްސަލަތަކަށް އަވަސް ހައްލެއް ލިބިގެންދާނެކަން މިނިސްޓަރު ފާހަގަކުރެއްވިއެވެ.
ފައިސާ ދޫކުރުމުގެ އިދާރީ ކަންކަމަށް އަލިއަޅުވާލައްވައި މިނިސްޓަރު ވިދާޅުވީ، ފައިސާ ޖަމާކުރުމުގެ މަރުހަލާއަކީ ގާތްގަނޑަކަށް ދެ މަސް ދުވަސް ހޭދަވާ ކަމެއް ކަމަށެވެ. އެހެންކަމުން ފައިސާ ބޭނުންވާ ތާރީހުގެ ދެ މަސް ކުރިން، ފުރިހަމަކުރަންޖެހޭ ފޯމުތަކާއި މައުލޫމާތު މިނިސްޓްރީއަށް ހުށަހެޅުމަށް ދަރިވަރުންނަށް އިލްތިމާސްކުރެއްވިއެވެ. އަދި ފައިސާ ބޭނުންވާ ތާރީހު ކައިރިވެ، ހަފްތާއެއްހާ ދުވަހަށް ވުމުން ހުށަހަޅާނަމަ، އިދާރީ މަރުހަލާތައް ނިންމައި ގަޑިއަށް ފައިސާ ދޫކުރުމަށް ދަތިވާނެކަން ވެސް ހައިދަރު ހަނދާންކޮށްދެއްވިއެވެ.
ދަރިވަރުންގެ ތައުލީމަށް ދައުލަތުން ބޮޑު ހޭދައެއް ކުރަމުންދާކަން ފާހަގަކުރައްވައި، އެ ފައިސާގެ ބޭނުން އެންމެ ހެޔޮ ގޮތުގައި ހިފުމަށް މިނިސްޓަރު ނަސޭހަތްތެރިވެވަޑައިގެންނެވިއެވެ. އަދި އަމިއްލަ މަސްލަހަތު ކުރިއަށް ނެރެގެން ކުރާ ކަންކަމުގައި ދަރިވަރުން ބައިވެރި ނުކުރުމަށް ވެސް މިނިސްޓަރު ވަނީ އެދިވަޑައިގެންފައެވެ.
ކޮމެންޓު ފޮނުވާ