އީރާނުގައި ދާދިފަހުން ކުރިއަށްދިޔަ މުޒާހަރާތަކުގައި "އެތައް ހާސް" ބަޔަކު މަރުވީ އެމެރިކާއާއި އިޒްރޭލާ ގުޅުން އޮންނަ ފަރާތްތަކުގެ ސަބަބުން ކަމަށް އެގައުމުގެ ރޫހީ ލީޑަރު އާޔަތުﷲ ޢަލީ ޚާމަނާއީ ތުހުމަތު ކުރައްވައިފިއެވެ.
ހޮނިހިރު ދުވަހު ވާހަކަފުޅު ދައްކަވަމުން ޚާމަނާއީ ވިދާޅުވީ، ދެ ހަފްތާއަށްވުރެ ގިނަ ދުވަހަށް ދެމިގެންދިޔަ މި ހަމަނުޖެހުންތަކުގައި ބޮޑެތި ގެއްލުންތައް ދީ، މީހުން މެރުމުގެ ފަހަތުގައިވަނީ އެމެރިކާއާއި އިޒްރޭލު ކަމަށެވެ. އަދި އެމެރިކާގެ ރައީސް ޑޮނަލްޑް ޓްރަމްޕަކީ "ކުށްވެރިއެއް" ގެ ގޮތުގައި އޭނާ ސިފަކުރެއްވިއެވެ.
މިކަމާ ގުޅިގެން ނަން ހާމަކުރަން ނޭދޭ އީރާނުގެ އޮފިޝަލަކު ރޮއިޓާސްއަށް މައުލޫމާތު ދިން ގޮތުގައި، މުޒާހަރާތަކުގައި މަރުވި މީހުންގެ އަދަދު 5،000 އަށްވުރެ މައްޗަށް އަރައެވެ. އޭގެ ތެރޭގައި ސަލާމަތީ ބާރުތަކުގެ 500 މީހުން ހިމެނޭކަމަށް އޭނާ ބުންޏެވެ. އަދި އެންމެ ބޮޑެތި ހަމަނުޖެހުންތައް ހިނގާފައިވަނީ ކުރުދީން ދިރިއުޅޭ ސަރަހައްދުތަކުގައެވެ.
އަލްޖަޒީރާއިން ރިޕޯޓުކޮށްފައިވާ ގޮތުގައި މިއީ މުޒާހަރާތަކުގައި މަރުވި މީހުންގެ އަދަދު އެތައް ހާހަކަށް އަރާކަމަށް އީރާނުގެ އެންމެ މަތީ ވެރިޔާ ވިދާޅުވި ފުރަތަމަ ފަހަރެވެ. ޚާމަނާއީ ތުހުމަތު ކުރެއްވި ގޮތުގައި މުޒާހަރާކުރި ފަރާތްތަކުން ވަނީ 250 އަށްވުރެ ގިނަ މިސްކިތާއި ސިއްހީ މަރުކަޒުތަކުގައި ރޯކޮށްލާފައެވެ.
އީރާނުން ބުނާ ގޮތުގައި އިގްތިސާދީ ދަތިތަކާ ހެދި ފެށުނު މުޒާހަރާތައް ފަހުން ވަނީ ބޭރުގެ ނުފޫޒު އޮންނަ ފަރާތްތަކުން ހައިޖެކްކޮށްފައެވެ. މީގެއިތުރުން، އިންޓަނެޓް ކަނޑާލާފައި އޮތުމަށްފަހު، މިހާރު އެގައުމުގައި އެސްއެމްއެސްގެ ޚިދުމަތް އަލުން ދޭން ފަށާފައިވާ ކަމަށްވެސް ރިޕޯޓުތައް ބުނެއެވެ.
ކޮމެންޓު ފޮނުވާ