ބައްޕަ ނިޔާވިއިރު ދޮންމަންމަ ހުރީ ވަރިކޮށްފައިކަމަށް ކަނޑައަޅައިދިނުމަށް އެދި ދަރިއަކު ސުޕްރީމް ކޯޓަށް މައްސަލައެއް ހުށަހަޅައިފިއެވެ. މިއީ ތަރިކަ މުދާ ބެހުމުގެ މައްސަލައެއްގެ ތެރެއިން އުފެދިފައިވާ ޚުސޫމަތެކެވެ. މި މައްސަލަ ސުޕްރީމް ކޯޓަށް ހުށަހެޅީ، ދަށު ކޯޓާއި ހައިކޯޓުން ވެސް ދަރިން އެދޭ ގޮތަށް އެކަން ސާބިތުކޮށްދެވެން ނެތްކަމަށް ނިންމުމާ ގުޅިގެންނެވެ.
މި މައްސަލައިގެ އަސްލަކީ 2021 ވަނަ އަހަރު ބަލި އެނދުގައި އޮވެ، ނިޔާވުމުގެ ހަތް ދުވަސް ކުރިން ބައްޕަ އޭނާގެ އަނބިމީހާ ވަރިކޮށް، ހެކިންގެ ހާޒިރުގައި އެކަން ލިޔުމުން ޑޮކިއުމެންޓްކޮށްފައިވާ ކަމަށް ބުނެ ދަރިން ދައްކާ ވާހަކައެވެ. ދަރިން ކޯޓަށް ދިޔައީ ބައްޕަ ނިޔާވިއިރު ކައިވެންޏެއް ދެމިއޮތްކަން ނުވަތަ ނޫންކަން ކަށަވަރުކޮށް، ތަރިކައިން ދޮންމަންމައަށް ވާބައި އުނިކުރުމަށެވެ. ނަމަވެސް ދޮންމަންމަ ކޯޓުގައި ބުނެފައިވަނީ މިއީ ތަރިކައިން އޭނާ މަހުރޫމް ކުރުމަށް، ފިރިމީހާ ނިޔާވިފަހުން ރާވައިގެން އުފައްދާފައިވާ ވާހަކަތަކެއް ކަމަށެވެ.
މި މައްސަލަ ފުރަތަމަ ބެލި ފެމެލީ ކޯޓުން ނިންމީ، މީހަކު ނިޔާވުމަށްފަހު ވަރި ސާބިތުކުރަން ކޯޓަށް ހުށަހެޅުމަކީ "ފަސާދައަށް މަގުފަހިވާ ކަމެއް" ކަމަށްވާތީ އެ މައްސަލަ ކުރިއަށް ނުގެންދެވޭނެ ކަމަށެވެ. އަދި ހައިކޯޓުގެ ފަނޑިޔާރުންގެ އަޣުލަބިއްޔަތުން ވެސް ތާއީދުކުރީ ފެމެލީ ކޯޓުގެ އެ ނިންމުމަށެވެ. މިދިޔަ ހަފުތާގައި މި މައްސަލަ ސުޕްރީމް ކޯޓަށް ވެއްދި ނަމަވެސް، މައްސަލަ ބަލައިގަތުމާމެދު އެ ކޯޓުން އަދި ވަކި ގޮތެއް ނިންމާފައެއް ނުވެއެވެ.
ކޮމެންޓު ފޮނުވާ