ފުލުހުންގެ ޑްރަގް އެންފޯސްމަންޓް ޑިޕާޓްމަންޓާއި ކައުންޓަރ ނާކޮޓިކްސް އިންޓެލިޖެންސް ގުޅިގެން މާލޭގައި ހިންގި ކާމިޔާބު އޮޕަރޭޝަނެއްގައި، ގިނަ އަދަދެއްގެ މަސްތުވާތަކެއްޗާއެކު ދެ މީހަކު ހައްޔަރުކޮށްފިއެވެ. ދިވެހި ފުލުހުންގެ ޚިދުމަތުން މަޢުލޫމާތު ދެއްވި ގޮތުގައި މި އޮޕަރޭޝަން ހިންގާފައިވަނީ މި ހިނގާ މަހުގެ 11 ވަނަ ދުވަހުއެވެ.
މި އޮޕަރޭޝަނުގައި ހައްޔަރުކޮށްފައިވަނީ ދެ ފިރިހެނުންނެވެ. އެމީހުން ހައްޔަރުކުރެވުނީ ފުލުހުންނަށް ލިބުނު އިންޓެލިޖެންސް މަޢުލޫމާތަކާ ގުޅިގެން، ކޯޓު އަމުރެއްގެ ދަށުން މާލޭ މައްޗަންގޮޅީ އަވަށުގެ ގެއެއް ބަލައި ފާސްކުރުމަށްފަހުގައެވެ. މި ގެ ބަލައި ފާސްކުރުމުގެ ތެރޭގައި ގިނަ އަދަދެއްގެ މަސްތުވާތަކެތި ފެނިފައިވާކަމަށް ފުލުހުން ކަށަވަރުކޮށްދެއެވެ.
މި މައްސަލައިގައި ހައްޔަރުކުރެވުނު މީހުންގެ ތެރެއިން އެކަކީ މއ. ނިއުޔޯކްހައުސް، ޢުމުރުން 26 އަހަރުގެ މުޙައްމަދު ޖިނާހް އިބްރާހީމް ކަމަށް ފުލުހުން ވަނީ ހާމަކޮށްފައެވެ. އަދި އާންމުކޮށް މިފަދަ ބޮޑެތި މައްސަލަތަކުގައި ޢަމަލުކުރާ އުޞޫލުން ފުލުހުން ވަނީ ޖިނާހްގެ ފޮޓޯވެސް މީޑިއާއަށް ޢާންމުކޮށްފައެވެ.
މި މައްސަލައިގައި ތުހުމަތުކުރެވޭ ދެ މީހުންގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، މުޙައްމަދު ޖިނާހް އިބްރާހީމް ބަންދުގައި ބެހެއްޓުމަށް 15 ދުވަހުގެ މުއްދަތެއް ކޯޓުން ވަނީ ޖަހައިދީފައެވެ. ނަމަވެސް، އޭނާއާއެކު ދެން ހައްޔަރުކުރި އަނެއް މީހާ، ޝަރުތުތަކެއް ކުރުމަށްފަހު ކޯޓުން ވަނީ ދޫކޮށްލާފައެވެ. މި މައްސަލަ ފުލުހުން ދަނީ އިތުރަށް ތަޙުޤީޤު ކުރަމުންނެވެ.
ކޮމެންޓު ފޮނުވާ