އީރާނުގައި މިހާރު ކުރިއަށްދާ މުޒާހަރާތަކަށް ތާއީދުކުރައްވައި ރާއްޖޭގެ ކުރީގެ ރައީސް މުޙައްމަދު ނަޝީދު ދެއްކެވި ވާހަކަފުޅުތަކަށް، ލަންކާއަށް ކަނޑައަޅުއްވާފައި ހުންނަވާ އީރާނުގެ ސަފީރު ވަރަށް ބޮޑަށް ފާޑުވިދާޅުވެ ރައްދު ދެއްވައިފިއެވެ.
ރައީސް ނަޝީދު އެކްސްގައި ކުރެއްވި ޕޯސްޓެއްގައި ވިދާޅުވީ، އީރާނުގެ ރައްޔިތުން މަގުތަކަށް ނުކުމެފައިވަނީ އަނިޔާވެރިކަމާއި ތަކެތީގެ އަގުބޮޑުވުމާ ދެކޮޅަށް ކަމަށާއި، ބައިނަލްއަޤުވާމީ މުޖުތަމަޢުން ތިބެންވާނީ ސަރުކާރަށްވުރެ ބޮޑަށް ރައްޔިތުންނާ އެކުގައި ކަމަށެވެ.
މިކަމަށް ރައްދު ދެއްވަމުން ލަންކާގައި ހުންނަ އީރާނު އެމްބަސީން ބުނެފައިވަނީ، މިއީ ޖޫން 2025 ގައި އިސްރާއީލާއި އެމެރިކާ ގުޅިގެން އީރާނަށް ދިން ލާއިންސާނީ ހަމަލާތަކާ ގުޅިގެން، ޤައުމު ހަމަނުޖެހުމެއްގެ ތެރެއަށް ވައްޓާލަން ރާވާފައިވާ ކަމެއް ކަމަށެވެ. އަދި މޮސާޑާ ގުޅުންހުރި ޓެރަރިސްޓުން މިސްކިތްތަކާއި އާންމު ތަންތަނަށް ގެއްލުންދީ، އެތައް ބަޔަކު ޝަހީދުކުރަމުންދާ މި ދަނޑިވަޅުގައި ނަޝީދު ހުންނެވީ ކޮން ފަރާތެއްގައިތޯ އެމްބަސީން ވަނީ ސުވާލު އުފައްދާފައެވެ.
ދެ ހަފުތާއަށްވުރެ ގިނަ ދުވަސްވެފައިވާ މި މުޒާހަރާތަކުގައި 116 އަށްވުރެ ގިނަ މީހުން މަރުވެފައިވާއިރު، އެމެރިކާގެ ރައީސް ޓްރަމްޕް ވަނީ މިކަމުގެ ތެރެއަށް ވަންނާނެކަމުގެ އިންޒާރު ދެއްވާފައެވެ. ނަމަވެސް އެމެރިކާއިން ހަމަލާދީފިނަމަ އިސްރާއީލާއި އެމެރިކާއަށް ރައްދު ދޭނެކަމަށް އީރާނުން ވެސް ވަނީ ބުނެފައެވެ.
ކޮމެންޓު ފޮނުވާ