ފެނަކަ ކޯޕަރޭޝަންގެ މެނޭޖިން ޑިރެކްޓަރުކަމުގައި ހުންނެވިއިރު ހިންގި ކޮރަޕްޝަންގެ މައްސަލައެއް ސާބިތުވެ، އަހުމަދު ސައީދު މުހައްމަދު (ފެނަކަ ސައީދު) ހަތަރު އަހަރަށް ޖަލަށް ލުމަށް ކްރިމިނަލް ކޯޓުން ކުރި ހުކުމް ހައިކޯޓުގައި އިސްތިއުނާފު ކުރުމުން އެ ކޯޓުން މައްސަލަ ބަލައިގެންފިއެވެ.
މިދިޔަ ސެޕްޓެންބަރު މަހު ސައީދުގެ މައްޗަށް މި ހުކުމް އިއްވީ، އެއްވެސް މަސައްކަތެއް ނުކުރަނީސް 'ބްލޭޒަން އިންކް' ނަމަކަށް ކިޔާ ކުންފުންޏަކާ އެކު ސެޓްލްމަންޓް އެއްބަސްވުމެއް ހަދައި ފައިސާ ދޫކުރި މައްސަލައިގައެވެ. ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށް ސާބިތުވެ އިއްވި މި ހުކުމާ ގުޅިގެން ސައީދުގެ ފަރާތުން ހުށަހެޅި އިސްތިއުނާފީ މައްސަލަ ހައިކޯޓުން މިހާރު ވަނީ ރަޖިސްޓްރީ ކޮށްފައެވެ.
މި މައްސަލައިގައި ދެން ހިމެނޭ ފެނަކައިގެ ޕްރޮކިއުމަންޓް ވެރިޔަކަށް އޭރު ހުންނެވި މަރްޔަމް ދީނާ ޞާލިޙުގެ މައްސަލަ ކޯޓުގައި ކުރިއަށް ދިޔަ ނަމަވެސް، ހުކުމަކާ ހަމައަށް ނުގޮސް އެ މައްސަލަ އޮތީ މަޑުޖެހިފައެވެ. ކުރިން ދެ މައްސަލަ އެކުގައި ކުރިއަށް ދިޔަ ނަމަވެސް، ސައީދުގެ ހުކުމަށްފަހު ދީނާގެ މައްސަލައަށް މާބޮޑު ކުރިއެރުމެއް ލިބިފައެއް ނުވެއެވެ.
ޖަލު ހުކުމުގެ އިތުރުން ވެސް ސައީދުގެ މައްޗަށް ކޮރަޕްޝަންގެ އިތުރު ދަޢުވާއެއް ކޯޓުގައި ދަނީ ހިނގަމުންނެވެ. އެއީ ކުންފުންޏަށް މާލީ ގޮތުން ގެއްލުންވާނެކަން އެނގިހުރެ އައިސްޕްލާންޓްތަކެއް ގަތް މައްސަލައިގައި އުފުލާފައިވާ، ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދަޢުވާއެވެ.
ކޮމެންޓު ފޮނުވާ