ނ. ކުޑަފަރީ ކައުންސިލުން ސިވިލް ސާވިސް ކޮމިޝަނާއި ފިނޭންސް މިނިސްޓްރީގެ ހުއްދައާ ނުލާ އެ އިދާރާގެ މުވައްޒަފުންނަށް ހާޒިރީ އެލަވަންސް ގެ ނަމުގައި ފައިސާ ދީފައިވާ މައްސަލަ އޮޑިޓަރ ޖެނެރަލްގެ އޮފީހުން ހާމަކޮށްފިއެވެ.
އޮޑިޓަރ ޖެނެރަލްގެ އޮފީހުން ނެރުނު ކުޑަފަރީ ކައުންސިލްގެ 2024 ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުން ހާމަވާ ގޮތުގައި ކައުންސިލް އިދާރާގައި މަސައްކަތްކުރާ މުވައްޒަފުންނަށް މަސައްކަތަށް ނުކުންނަ ކޮންމެ ދުވަހަކަށް 75 ރުފިޔާ ދިނުމަށް ކައުންސިލް ބައްދަލުވުމަކުން ނިންމާފައިވެއެވެ. ނަމަވެސް މި އެލަވަންސް އަކީ ސިވިލް ސާވިސް މުވައްޒަފުންނަށް ދޭ އެލަވަންސް ތަކުގެ ތެރޭގައި ހިމެނޭ އެއްޗެއް ނޫނެވެ. މި އެލަވަންސް ދިނުމަށް ކައުންސިލުން ސިވިލް ސާވިސް ކޮމިޝަނާ މަޝްވަރާކޮށްފައިވާކަން ލިޔެކިޔުމުން އެނގެން ނެތްކަމަށް އޮޑިޓް ރިޕޯޓުގައިވެއެވެ.
ކައުންސިލުން މިކަމާ ގުޅިގެން ފިނޭންސް މިނިސްޓްރީއަށް ލިޔުމުން އެދުނު ނަމަވެސް އެޓެންޑެންސް އެލަވަންސް ދިނުމަށް ނުފެންނަކަމަށް މިނިސްޓްރީން ރަސްމީކޮށް އަންގާފައިވާކަން ރިޕޯޓުގައި ފާހަގަކޮށްފައިވެއެވެ. ނަމަވެސް މިނިސްޓްރީގެ ހުއްދަ ނެތް ނަމަވެސް ކައުންސިލުން 2025 ވަނަ އަހަރުގެ މާރޗު މަހުން ފެށިގެން މުވައްޒަފުންނަށް މި އެލަވަންސް ދޭން ފަށާފައިވާކަން ހާމަވެއެވެ. އޮޑިޓް ހިންގި 7 ޖުލައި 2025 ގެ ނިޔަލަށް މި އެލަވަންސް ގެ ގޮތުގައި 59،475 ރުފިޔާ ހަރަދުކޮށްފައިވެއެވެ.
މި އެލަވަންސް ދިނުމަކީ ދައުލަތުގެ މާލިއްޔަތު ގަވާއިދުގެ ދަށުން ހުއްދަ ނޫން އަމަލެއްކަމުގައި ބަލައި، މި މައްސަލަ ބެލުމަށްފަހު ފިޔަވަޅު އަޅަންޖެހޭ ފަރާތްތަކާ މެދު ފިޔަވަޅު އެޅުމަށް އޮޑިޓް ރިޕޯޓުގައި އަންގާފައިވެއެވެ. އަދި ހުއްދަ ނެތި ދީފައިވާ މި ފައިސާ އަނބުރާ ދައުލަތަށް ހޯދުމަށާއި، ސިވިލް ސާވިސް ކޮމިޝަނާއި ފިނޭންސް މިނިސްޓްރީއާ މަޝްވަރާކޮށް ނިންމާ ގޮތެއްގެ މަތިން މި ކަމުގައި އަމަލުކުރުމަށް އޮޑިޓަރ ޖެނެރަލްގެ އޮފީހުން ލަފާދީފައިވެއެވެ.
ކޮމެންޓު ފޮނުވާ