ވައިގަދަވެ ކަނޑު ގަދަވުމުގެ ސަބަބުން ބައެއް ސަރަހައްދުތަކަށް ހުދު ސަމާލު ނެރެފި

މެޓް އޮފީހުން ޅ އަތޮޅުން މ އަތޮޅަށް ހުދު ސަމާލު ނެރެފިއެވެ. މިއަދު މެންދުރު 8:00 އިން ހަވީރު 3:00 އާ ހަމައަށް މި ސަރަހައްދުތަކުގައި 19 މޭލާ 24 މޭލާ ދެމެދުގެ ބާރުމިނެއްގައި ވައިޖެހި ކަނޑުތައް ގަދަވާނެ ކަމަށް މެޓް އޮފީހުން ލަފާކުރެއެވެ.

މިއަދުގެ އިރުއޮއްސި 6:00 އާ ހަމައަށް ދިވެހިރާއްޖޭގެ ތަފާތު ސަރަހައްދުތަކުގައި މޫސުން ތަފާތުވާނެކަމަށް މެޓުން ލަފާކުރެއެވެ. މެދުރާއްޖެ ތެރޭގެ އެކި ހިސާބުތަކަށް އިތުރުއާއި އިރުން ގަޑިއަކު 13 މޭލާ 23 މޭލާ ދެމެދުގެ ބާރުމިނުގައި ވައިޖެހޭނެއެވެ. އުތުރުގެ އަތޮޅުތަކުގައި ކަނޑުތައް މަޑުވާނެ ކަމަށާ، ދެކުނުގައި އާދައިގެ ވަރަކަށް ގަދަވާނެ ކަމަށާއި، އެހެން ސަރަހައްދުތަކުގައި ކަނޑުތައް ގަދަވާނެ ކަމަށް މެޓް އޮފީހުން ބުނެފައިވެއެވެ.