އެމެރިކާއިން އޭނާ ރަހީނު ކޮށްފައިވާ ކަމަށް ބުނެ، އުފުލާފައިވާ ދައުވާތަކަށް ވެނެޒުއޭލާގެ ރައީސް ނިކޮލަސް މަދޫރޯ އިންކާރު ކޮށްފިއެވެ. އެމެރިކާގެ މެންހަޓަން ކޯޓުގައި މަދޫރޯ ވިދާޅުވީ، އޭނާ ކަރާކަސްގައި ގޭގައި ހުއްޓާ، ޖެނުއަރީ 3 ވީ ދުވަހު ރަހީނު ކުރެވިފައިވާ ކަމަށެވެ.
މަދޫރޯއަށް މަސްތުވާތަކެތީގެ ވިޔަފާރިއާއި ޓެރަރިޒަމް ހަމަލާތައް ދޭން ރޭވުން ފަދަ ގިނަ ދައުވާތައް އެމެރިކާއިން އުފުލާފައިވާއިރު، އޭނާގެ އަނބިކަނބަލުން ސިލިއާ ފްލޮރެސްވެސް އެ ދައުވާތަކަށް އިންކާރު ކުރިއެވެ. ކޯޓުން މަދޫރޯގެ ދެކަނބަލުން ބަންދުގައި ބޭތިއްބުމަށް އަމުރުކޮށް، އިތުރު އަޑުއެހުން މާޗު 17 އަށް ތާވަލުކޮށްފައިވެއެވެ.
އެމެރިކާއިން މަދޫރޯ ހައްޔަރު ކޮށްފައިވާއިރު، ވެނެޒުއޭލާގެ ނައިބު ރައީސް ޑެލްސީ ރޮޑްރީގޭޒް ވަނީ ރަސްމީކޮށް ރައީސްކަމުގެ ހުވާ ކުރައްވާފައެވެ. އަދި އެމެރިކާއާ އެކު މަސައްކަތް ކުރުމަށް ތައްޔާރު ހުރިކަމުގެ އިޝާރާތެއް އޭނާ ވަނީ ދީފައެވެ.
އެމެރިކާގެ ރައީސް ޑޮނަލްޑް ޓްރަމްޕު ވިދާޅުވީ، މަދޫރޯގެ ފަހު ވެނެޒުއޭލާގެ ކަންކަން އެމެރިކާގެ ސަރުކާރުން ގާތްކޮށް ބަލާނެ ކަމަށާއި، ކައިރި މުސްތަގުބަލުގައި ވެނެޒުއޭލާގައި އިންތިހާބެއް ބޭއްވުމުގެ ފުރުސަތެއް ނެތް ކަމަށެވެ.
ކޮމެންޓު ފޮނުވާ