އެމެރިކާއިން ވެނެޒުއޭލާއަށް ދިން އަސްކަރީ ހަމަލާއާއި އެ ގައުމުގެ ރައީސް ނިކޮލަސް މަދޫރޯ ހައްޔަރުކުރުން ޗައިނާއިން ވަރަށް ހަރުކަށި ގޮތެއްގައި ކުށްވެރިކޮށްފިއެވެ.
ޗައިނާގެ ޚާރިޖީ ވުޒާރާގެ ތަރުޖަމާނު ނެރުނު ބަޔާނެއްގައި ބުނީ އެމެރިކާއިން ފާޅުކަން ބޮޑު ގޮތެއްގައި ބާރުގެ ބޭނުން ކުރުމަކީ ބައިނަލްއަގްވާމީ ގާނޫނާ ހިލާފު، ވެނެޒުއޭލާގެ އިސްތިގުލާލަށް ހުރަސް އަޅާ، ލެޓިން އެމެރިކާ އާއި ކެރިބިއަން ސަރަހައްދުގެ ސުލްހައަށް ނުރައްކާވާ ކަމެއް ކަމަށާއި، މި އަމަލަށް ވަރުގަދައަށް ދެކޮޅު ހަދާ ކަމަށެވެ.
ވެނެޒުއޭލާއިން ތެޔޮ އެންމެ ގިނައިން ގަންނަ ގައުމު ކަމަށްވާ ޗައިނާ އަކީ ބްރެޒިލް، ރަޝިޔާ، ކޮލަމްބިއާ، މެކްސިކޯ އަދި ކިއުބާ ފަދަ ގައުމުތަކުގެ އިތުރުން އެމެރިކާގެ މި އަމަލު ކުށްވެރިކުރި ގައުމެވެ. ހަމަލާ ދިނުމުގެ ކުރީގައި ހުކުރު ދުވަހު މަދޫރޯ ވަނީ ކަރަކާސްގައި ޗައިނާގެ މަތީ ފެންވަރުގެ ވަފުދަކާ ބައްދަލުކުރައްވާފައެވެ.
އެމެރިކާގެ ހަމަލާތަކަށް ފަހު މަދޫރޯ އާއި އޭނާގެ އަނބިކަނބަލުން ހައްޔަރުކޮށްގެން ގެންގޮސް މިހާރު ނިއު ޔޯކްގެ ޖަލެއްގައި ބަންދުކޮށްފައި ވާއިރު، ޗައިނާއިން ވަނީ އެ ގައުމުގެ ރައްޔިތުންނަށް ވެނެޒުއޭލާއަށް ދަތުރުކުރުން ވަގުތީ ގޮތުން ހުއްޓާލުމަށް އިލްތިމާސްކޮށްފައެވެ.
ކޮމެންޓު ފޮނުވާ