މޯލްޑިވިއަން އިން ޑާކާ ދަތުރުތައް މާޗްމަހު އަލުން ފަށަނީ

ގައުމީ އެއާލައިން މޯލްޑިވިއަން އިން މާލެ އާއި ބަންގްލަދޭޝްގެ ވެރިރަށް ޑާކާއާ ދެމެދު ސީދާ ދަތުރުތައް އަންނަ މާޗް 12 ވަނަ ދުވަހުން ފެށިގެން އަލުން ފަށަން ނިންމައިފިއެވެ. މި ނިންމުން ނިންމާފައިވަނީ ރާއްޖޭގައި މަސައްކަތްކުރާ ބަންގްލަދޭޝްގެ ރައްޔިތުންނާއި ދިވެހި ދަތުރުވެރިންގެ ފަރާތުން މި ދަތުރުތަކަށް ލިބުނު ބޮޑު ތަރުހީބަށް ބަލައި، ދެ ގައުމުގެ ދެމެދުގައި އޮތް ގުޅުން ވަރުގަދަ ވުމުގެ ސަބަބުންނެވެ.

ހަފްތާއަކު ދެ ދުވަހު ބުރާސްފަތި އަދި އާދީއްތަ ދުވަހު ދަތުރުތައް ކުރިއަށްދާނެއެވެ. ރަމަޟާން މަހުގެ ފަހުކޮޅާއި ފިތުރު އީދު ބަންދާ ދިމާކޮށް މި ދަތުރުތައް އަލުން ފަށާއިރު، ދެކޮޅު ޓިކެޓްގެ އަގު 399 އެމެރިކާ ޑޮލަރުން ފަށައި، ކޮންމެ ފަސިންޖަރަކަށް 30 ކިލޯގެ ބެގޭޖްއާއި ފްލައިޓްގައި ކެއުމުގެ ޚިދުމަތް ވެސް ލިބޭނެއެވެ. މޯލްޑިވިއަންގެ ވެބްސައިޓް، މޮބައިލް އެޕް، އީމެއިލް ނުވަތަ 1671 އަށް ގުޅުއްވައިގެން ޓިކެޓް ބުކްކުރެވޭނެއެވެ.

މި ދަތުރުތައް އަލުން ފެށުމުގެ އުފަލުގައި، މި މަހުގެ 9 ވަނަ ދުވަހު "ޑާކާ ވީ ހާޑް ޔޫ" ގެ ނަމުގައި މިއުޒިކް ފެސްޓިވަލެއް ބާއްވަން ވެސް މޯލްޑިވިއަނުން ނިންމާފައި ވެއެވެ. 26 ބޯޓުގެ ފްލީޓަކާއެކު މީހުން އުފުލާ ގައުމީ އެއާލައިނުން ބުނީ ޑާކާއަކީ ވިޔަފާރި، ސަރަހައްދީ ގުޅުންތަކާއި، ކުރު މުއްދަތުގެ ޒިޔާރަތްތަކަށް ދިވެހިންގެ މެދުގައި މަގުބޫލު މަންޒިލަކަށްވުމާއެކު، މި ދަތުރުތަކުގެ ސަބަބުން ދެ ގައުމުގެ ވެރިރަށްތައް ގުޅުވާލައި ފަސޭހަ ދަތުރުފަތުރުގެ ނިޒާމެއް ގާއިމްވެގެންދާނެ ކަމަށެވެ.