މީހުން އޮޅުވާލައިގެން ފައިސާ ހޯދަމުން ދިޔަ މީހަކު ފުލުހުން ހައްޔަރު ކޮށްފި

މީހުން އޮޅުވާލައިގެން ފައިސާ ހޯދަމުން ދިޔަ މީހަކު ފުލުހުން ހައްޔަރުކޮށްފިއެވެ. މި މައްސަލާގައި ހައްޔަރުކޮށްފައިވަނީ މާލޭ ގުލްޝަންކިނާރާގެ އަޙްމަދު ޢިރުފާލް، 36 އަހަރެވެ. މަކަރާއި ހީލަތުން މީހުން އޮޅުވާލައިގެން ފައިސާ ހޯދަމުންދާކަމަށް ފުލުހުންނަށް ހުށަހެޅިފައިވާ 9 މައްސަލައެއްގައި އޭނާގެ މައްޗަށް ތުހުމަތުކުރެވިގެން މި މަހުގެ 24 ވަނަ ދުވަހު ކޯޓު އަމުރަކާއެކު ހައްޔަރުކޮށްފައިވާކަމަށް ފުލުހުން ބުނެއެވެ.

ތަހުގީގަށް ލިބިފައިވާ މައުލޫމާތުން ދައްކާގޮތުން އަޙްމަދު ޢިރުފާލް މި އަހަރުގެ މެއި މަހުން ފެށިގެން ވަނީ މަކަރާއި ހީލަތުން އެކި ފަރާތްތަކުގެ އަތުން 50،000 ރުފިޔާއަށްވުރެ ގިނަ ފައިސާ ހޯދައިފައެވެ. އޭނާގެ ނަމުގައި ދެ ބޭންކެއްގައި ހުޅުވާފައިވާ އެކައުންޓަށް އެ ފައިސާ ޖަމާކުރުމަށްފަހު ނަގާފައިވާކަމަށް ފާހަގަކުރެވިފައި ވެއެވެ. މި މައްސަލައާ ގުޅިގެން އޭނާ ކޯޓަށް ހާޒިރުކުރުމުން 15 ދުވަހަށް ބަންދުކުރަން އަމުރުކޮށްފައިވެއެވެ. މި މައްސަލަ އެންޓި ސްކޭމް ސެންޓަރުން ދަނީ ތަހުގީގުކުރަމުންނެވެ.