ރާއްޖޭގައި އިތުރުވަމުން އަންނަ އޮންލައިން ސްކޭމްތަކާ ދެކޮޅަށް މި އަހަރުގެ މާރިޗް 17 ގައި ޤާއިމްކުރި އެންޓި-ސްކޭމް ސެންޓަރުން ފާއިތުވި 10 މަހުގެ ތެރޭގައި ވަނީ ކުށްވެރިންގެ އަތްދަށުން ފައިސާ އަނބުރާ ހޯދުމުގައި ފާހަގަކޮށްލެވޭ ކުރިއެރުމެއް ހޯދާފައެވެ. ފުލުހުން މިއަދު ބޭއްވި ނޫސްވެރިންގެ ބައްދަލުވުމުގައި ހާމަކުރި ގޮތުގައި އެ ސެންޓަރަށް މިހާތަނަށް 1،663 މައްސަލަ ހުށަހަޅާފައިވާއިރު، މި މައްސަލަތަކުގައި ގެއްލުނު 22.7 މިލިޔަން ރުފިޔާގެ ތެރެއިން 8.5 މިލިޔަން ރުފިޔާ އަނބުރާ ހޯދާފައިވެއެވެ. މިއީ ގެއްލުނު ފައިސާގެ 37 އިންސައްތައެވެ.
ހުށަހެޅުނު މައްސަލަތަކުގެ ތެރެއިން 539 މައްސަލައެއްގައި ގެއްލުނު ހުރިހާ ފައިސާއެއް ހޯދާފައިވާއިރު، 143 މައްސަލައެއްގައި އެއްބައި ފައިސާ އަނބުރާ ހޯދިފައިވާކަން ފުލުހުން ހާމަކުރިއެވެ. އެންޓި-ސްކޭމް ސެންޓަރުގެ ވެރިޔާ އިންސްޕެކްޓަރ އޮފް ޕޮލިސް އާދަމް ނަވީދު ވިދާޅުވީ މިއީ ދުނިޔޭގެ ކުރިއަރާފައިވާ ޤައުމުތަކާ އަޅާބަލާއިރު ވަރަށް ބޮޑު އަދަދެއް ކަމަށާއި ސިންގަޕޫރުގެ އެންޓި-ސްކޭމް ސެންޓަރުން ވެސް ނުހޯދާ ވަރުގެ ކުރިއެރުމެއް ދިވެހިރާއްޖެއިން ހޯދާފައިވާ ކަމަށެވެ. ސިންގަޕޫރުގައި ގެއްލުނު 1 ބިލިޔަން ޑޮލަރުގެ ތެރެއިން އެބޭފުޅުންނަށް ހޯދިފައިވަނީ 22 އިންސައްތަ ކަމަށް އޭނާ ވިދާޅުވިއެވެ.
ފުލުހުންގެ ތަފާސް ހިސާބުތަކުން ދައްކާ ގޮތުގައި ސްކޭމްގެ ޝިކާރައަކަށް އެންމެ ގިނައިން ވަނީ ޒުވާނުންނާއި މެދު ޢުމުރުގެ ފިރިހެނުން ކަމަށާއި އެންމެ ގިނައިން ސްކޭމް ހިންގަނީ ފޭސްބުކް މާކެޓްޕްލޭސް މެދުވެރިކޮށް ކަމަށް ވެއެވެ. އެފަދަ 603 މައްސަލަ ހުށަހަޅާފައިވާކަން ފުލުހުން ހާމަކުރިއެވެ. އެންޓި-ސްކޭމް ސެންޓަރުން ސިންގަޕޫރުގެ އިސްނަގާ ހިންގާ ފްރޮންޓިއަރ ޕްލަސް އޮޕަރޭޝަންގައި ބައިވެރިވެ ދުނިޔޭގެ 12 ޤައުމެއްގެ އެންޓި-ސްކޭމް ސެންޓަރާ އެކު މަސައްކަތްކުރަމުން އަންނަކަން ފާހަގަކޮށް، މި މަސައްކަތުގެ ނަތީޖާއަކަށްވީ ގޮތުން ދާދިފަހުން ހިންގި 250،000 ޑޮލަރުގެ ސްކޭމް މައްސަލައެއްގައި ރާއްޖެއިން ބޭރުވި ފައިސާ އަނބުރާ ގެނައުމުގެ މަސައްކަތް ކުރެވިފައިވާކަން ފުލުހުން ހާމަކުރިއެވެ.
ކޮމެންޓު ފޮނުވާ