މި އަހަރުގެ މިހާތަނަށް އިންޓަނެޓު މެދުވެރިކޮށް ކުށްކުރުމުގެ 814 މައްސަލައެއް ފުލުހުންނަށް ހުށަހެޅިފައިވާ ކަމަށާއި މިދިޔަ އަހަރާ އަޅާބަލާއިރު މިއީ 90 ޕަސެންޓުގެ އިތުރުވުމެއް ކަމަށް ފުލުހުން ހާމަކޮށްފިއެވެ. ނޫސްވެރިންގެ ބައްދަލުވުމެއްގައި ސައިބާ ކްރައިމް ސެންޓަރުގެ ވެރިޔާ ސުޕްރިންޓެންޑެންޓް އޮފް ޕޮލިސް މުހައްމަދު ޝަމީމް ވިދާޅުވީ ހުށަހެޅުނު މައްސަލަތަކުގެ ތެރޭގައި އެންމެ ގިނައީ ސްކޭމްގެ މައްސަލަތަކާއި އެކައުންޓު ހެކްކުރުމުގެ މައްސަލަތައް ކަމަށެވެ.
ހުށަހެޅުނު މައްސަލަތަކުގެ 66 ޕަސެންޓަކީ ސްކޭމާ ގުޅޭ މައްސަލަތަކަށްވާއިރު، 10 ޕަސެންޓަކީ ބްލެކްމެއިލް ކުރުމުގެ މައްސަލަތަކެވެ. ފާއިތުވި 10 މަހުގެ ތެރޭގައި ސްކޭމްގެ ސަބަބުން ގެއްލުނު ފައިސާގެ 37 ޕަސެންޓު އަނބުރާ ހޯދިދެވިފައިވާ ކަމަށް ފުލުހުން ބުނެއެވެ. އެންޓި ސްކޭމް ސެންޓަރަށް ހުށަހެޅި މައްސަލަތަކުގައި ގެއްލުނު 22 މިލިއަން ރުފިޔާގެ ތެރެއިން 8.5 މިލިއަން ރުފިޔާ އަނބުރާ ހޯދިދެވިފައިވެއެވެ.
އެންމެ ބޮޑު ކަންބޮޑުވުމަކީ ސްކޫލްތަކުގެ ދަރިވަރުންނާއި މުވައްޒަފުން އަދި ބެލެނިވެރިންނަށް އަމާޒުކޮށް ހިންގާ ކޮންފެޝަން ޕޭޖުތައް ކަމަށް ފުލުހުން ބުނެއެވެ. މިހާތަނަށް ތިން ޕޭޖެއް އަތުލައިގަނެ 19 ޕޭޖެއް ޓޭކްޑައުންކޮށްފައިވެއެވެ. އިންޓަޕޯލްއިން ކުރިއަށްގެންދިޔަ ސައިބާ ސެކިއުރިޓީ އޮޕަރޭޝަނެއްގައި ބައިވެރިވެ 20،000 އަށްވުރެ ގިނަ ޑޮމެއިން އާއި އައިޕީ އެޑްރެސް ނައްތާލެވުނު ކަމަށްވެސް ފާހަގަކުރެވެއެވެ.
ފުލުހުންގެ ސައިބާ ސެކިއުރިޓީ އޮޕަރޭޝަންސް ސެންޓަރު ގާއިމުކުރީ މި އަހަރުގެ އޮގަސްޓު މަހުއެވެ. އެންޓި ސްކޭމް ސެންޓަރު ގާއިމުކުރި 2021 ވަނަ އަހަރާ ހަމައަށް 6،000 އަށްވުރެ ގިނަ ދިވެހިން ސްކޭމްތަކުގެ ޝިކާރައަކަށްވެ 110 މިލިއަން ރުފިޔާ ގެއްލިފައިވާ ކަމަށް ފުލުހުން މިއަދު ހާމަކުރިއެވެ.
ކޮމެންޓު ފޮނުވާ