އެމްޑީޕީގެ ކުރީގެ ރައީސް، މަޖިލީހުގެ ކުރީގެ ރައީސް މުހައްމަދު ނަޝީދާއި، އެމްޑީޕީގެ އެޑްވައިޒަރު، ކުރީގެ ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މިއަދު ހެނދުނު އެމްޑީޕީ އޮފީހުގައި ބައްދަލުކުރައްވައިފިއެވެ.
2023 ވަނަ އަހަރުގެ ރިޔާސީ އިންތިހާބުގައި އުފެދުނު ސިޔާސީ ޚިލާފުތަކަށް ފަހު އެދެބޭފުޅުން ބައްދަލުކުރެއްވި މިއީ ފުރަތަމަ ފަހަރެވެ. ނަޝީދު 2023 ގައި އެމްޑީޕީން ވަކިވެ ދަ ޑިމޮކްރެޓްސް އުފެއްދުމަށް ފަހު، މިދިޔަ ޖޫން މަހު އެ ޕާޓީގެ މެންބަރުން އަލުން އެމްޑީޕީއާ ގުޅިވަޑައިގެންފައިވެއެވެ.
މިއަދުގެ ބައްދަލުކުރެއްވުމަށް ނޫސްވެރިންނަށް މައުލޫމާތު ދެއްވަމުން ރައީސް ސާލިހު ވިދާޅުވީ މާޒީގަ ކަން ހިނގާފަ އޮތްގޮތުގެ ވާހަކަ ދެއްކުމަށްވުރެ މުހިންމީ އެކީގަ ކުރިޔަށްދިއުން ކަމަށެވެ. އަދި ކުރިޔަށް އޮތް ލޯކަލް ކައުންސިލް އިންތިޚާބަށްފަހު ދެބޭފުޅުންވެސް އެކީ އެމްޑީގެ މަސައްކަތްތަކުގައި ކުރިޔަށް ވަޑައިގަންނަވާނެ ކަމުގައި ރައީސް ސާލިހު ވިދާޅުވިއެވެ. ނޫސްވެރިންނަށް މައުލޫމާތު ދެއްވަމުން ނަޝީދު ވިދާޅުވީ ދެބޭފުޅުންނަށްވެސް ހުރި ތަފާތުތައް އެއްކައިރި ކުރެވުމަށްފަހު އެކީގައި ކުރިޔަށް ވަޑައިގެންނެވޭނެކަމުގެ ޔަގީންކަން އޮތް ކަމުގައެވެ. އަދި ރައީސް ޔާމިންއާއެކީވެސް މިސަރުކާރު ޒިންމާދާރު ކުރުވުމަށް މަސައްކަތް ނުކުރެވެންވީ ސަބަބެއް ފެނިވަޑައި ނުގަންނަވާކަމަށްވެސް ދެބޭފުޅުން ވިދާޅުވިއެވެ. އޭގެ އެއް ސަބަބެއްގެ ގޮތުގައި ނަޝީދު ވިދާޅުވީ، މީގެކުރިން ރައީސް މައުމޫންއާއެކުވެސް މަސައްކަތް ކުރެއްވުނު ކަމަށާއި، އެހެންކަމުން ރައީސް ޔާމިންއައެކު މަސައްކަތް ނުކުރެވެންވީ ސަބަބެއް ފެނިވަޑައި ނުގަންނަވާ ކަމަށެވެ.
ކޮމެންޓު ފޮނުވާ