ބައިނަލްއަގުވާމީ އެންޓި-ކޮރަޕްޝަން ދުވަހުގެ މުނާސަބަތުގައި ރައީސް ޑރ. މުހައްމަދު މުއިއްޒު ރޭ ވިދާޅުވީ މި ސަރުކާރުން ކޮރަޕްޝަނަށް އެއްވެސް ޖާގައެއް ނުދޭނެ ކަމަށެވެ. ރައީސް ފޮނުއްވި މެސެޖުގައި ވަނީ ނިޒާމީ ކޮރަޕްޝަނުގެ ސަބަބުން ގާނޫނީ ވެރިކަން ފުނޑުފުނޑުވެ ޑިމޮކްރެޓިކް ނިޒާމު ބަލިކަށިވުމާއި ރައްޔިތުންގެ އަސާސީ ހައްގުތަކަށް ނުރައްކާވެރިވާ ކަމަށް ފާހަގަކުރައްވައިފައެވެ.
ކޮރަޕްޝަނާ ދެކޮޅަށް ރާއްޖެއިން ކުރަމުން އަންނަ މަސައްކަތްތަކުގެ ތެރޭގައި "މޯލްޑިވްސް 2.0 ޑިޖިޓަލް ޓްރާންސްފޯމޭޝަން ޕްރޮޖެކްޓް" އާއި ގާނޫނުލްއުގޫބާތަށް ގެނައި ބަދަލުތަކުގެ ތެރެއިން އެސެޓް ރިކަވަރީގައި އޭސީސީން ކުރާ މަސައްކަތްތައް ރައީސް މުއިއްޒު ފާހަގަކުރެއްވިއެވެ. އަދި ހާއްސަ އެންޓި-ކޮރަޕްޝަން އެކަޑަމީއެއް އުފެއްދުމާއި "ހިންމި" ކޮރަޕްޝަން ރިސްކު ސެލްފް އެސެސްމަންޓް ޓޫލްކިޓް ތައާރަފުކުރުން ފަދަ މަސައްކަތްތައް ވެސް ރައީސް ފާހަގަކުރެއްވިއެވެ.
ކޮރަޕްޝަން ނައްތާލުމުގައި ހަމައެކަނި ސަރުކާރުގެ މަސައްކަތުން ފުއްދައެއް ނުލިބޭނެ ކަމަށާއި އަމިއްލަ ފަރާތްތަކުގެ ބައިވެރިވުން ވެސް ވަރަށް މުހިއްމު ކަމަށް ރައީސް ވިދާޅުވިއެވެ. އދ.ގެ ކޮންވެންޝަން އެގެއިންސްޓް ކޮރަޕްޝަންގައި 2007 ވަނަ އަހަރު ރާއްޖެ އިން ބައިވެރިވުމަކީ ކޮރަޕްޝަން ނައްތާލަން ދޭ އަހަންމިއްޔަތުކަން ހާމަކޮށްދޭ ކަމެއް ކަމަށާއި އެ މުއާހަދާގެ އުސޫލުތައް ދެފުށް ފެންނަ ގޮތެއްގައި ދަމަހައްޓަން ރާއްޖެ އިން އަބަދުވެސް މަސައްކަތް ކުރާނެ ކަމަށް ރައީސް ވިދާޅުވިއެވެ.
ކޮމެންޓު ފޮނުވާ