ބައިނަލްއަގްވާމީ އެންޓި ކޮރަޕްޝަން ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވީ، ދިވެހިރާއްޖެއަކީ ހާމަކަން ބޮޑު، ދެފުށްފެންނަ ނިޒާމެއްގެ އިތުރުން، ޖަވާބުދާރީކުރުވުމާއި ނަޒާހާތްތެރިކަމަށް ހާއްސަ އަހަންމިއްޔަތުކަމެއް ދޭ ގައުމެއްގެ ގޮތުގައި ސާބިތުވެފައިވާ ކަމަށެވެ.
ރައީސް ފޮނުއްވި މެސެޖުގައި، 2007 ވަނަ އަހަރު އދ ގެ ކޮންވެންޝަން އަގެއިންސްޓް ކޮރަޕްޝަން ގައި ދިވެހިރާއްޖެއިން ބައިވެރިވުމަކީ މިކަމަށް ދޭ އަހަންމިއްޔަތުކަން ހާމަކޮށްދޭ ކަމެއްކަމަށް ސިފަކުރައްވައި، މި މުއާހަދާގެ އުޞޫލުތައް ހާމަކަމާއެކު ދަމަހައްޓަން ރާއްޖެއިން އަބަދުވެސް މަސައްކަތް ކުރާނެކަމުގައި ވިދާޅުވިއެވެ. ނިޒާމީ ކޮރަޕްޝަނުގެ ސަބަބުން ޤާނޫނުގެ ވެރިކަން ފުނޑުފުނޑުވެ، ދެމެހެއްޓެނިވި ތަރައްޤީއަށް ހުރަސްއެޅި، ރައްޔިތުންގެ އަސާސީ ޙައްޤުތައް ނިގުޅައިގަނެވޭކަން ފާހަގަކުރައްވައި، ކޮރަޕްޝަނަށް މި ސަރުކާރުން އެއްވެސް ޖާގައެއް ނުދެއްވާ ކަމަށް ރައީސް ވިދާޅުވިއެވެ.
ސަރުކާރުގެ ޚިދުމަތްތައް ޒަމާނީ ފެންވަރަށް ގެނައުމުގެ މަޝްރޫޢް، މޯލްޑިވްސް 2.0 ޑިޖިޓަލް ޓްރާންސްފޯމޭޝަން ޕްރޮޖެކްޓާއި، އެސެޓް ރިކަވަރީގައި އެންޓި ކޮރަޕްޝަން ކޮމިޝަނުން ކުރައްވަމުން ގެންދަވާ މަސައްކަތްތަކުގެ މައްޗަށް ރައީސް އަލިއަޅުއްވައިލެއްވިއެވެ. މީގެ އިތުރުން، 20 އަހަރުގެ ޤައުމީ ތަރައްޤީގެ ޕްލޭން، "ހިންމި" ކޮރަޕްޝަން ރިސްކް ސެލްފް އެސެސްމަންޓް ޓޫލްކިޓް ތަޢާރަފްކުރުމާއި، ހަރުދަނާ ފަންނީ މުވައްޒަފުން ލިބޭނެ އިންތިޒާމު ހަމަޖެއްސުމަށް ޚާއްސަ އެންޓި ކޮރަޕްޝަން އެކަޑަމީއެއް އުފެއްދެވުން ފާހަގަކުރެއްވިއެވެ.
ރައީސް ވިދާޅުވީ، ކޮރަޕްޝަނާ ދެކޮޅަށް މަސައްކަތްކުރުމުގައި އަމިއްލަ ފަރުދުންނާއި ފަރާތްތަކުގެ ބައިވެރިވުމަކީ ކޮންމެހެން ބޭނުންތެރި ކަމެއްކަމަށާއި، ގައުމަށް އަމާނާތްތެރިވުމާއި ދެފުށް ފެންނަ އުސޫލުތައް ދެމެހެއްޓުމަކީ ގައުމުގެ އެންމެން ގުޅިގެން އަދާކުރަންޖެހޭ ވާޖިބެއްކަމަށެވެ. ނަޒާހަތްތެރިކަމާއި ޤާނޫނުގެ ވެރިކަން ނަގަހައްޓައި، ޢަދުލު އިންޞާފު ޤާއިމުކުރާ ގައުމެއްގެ ގޮތުގައި މި ސަރުކާރުން އަބަދުވެސް މަސައްކަތް ކުރައްވާނެކަމަށް ރައީސް ވިދާޅުވިއެވެ. 2003 ވަނަ އަހަރު އދ ގެ އާންމު މަޖިލީހުން މި ކޮންވެންޝަން ބަލައިގަތުމާ ގުޅުވައިގެން، ކޮންމެ އަހަރެއްގެ ޑިސެމްބަރު 9 ވަނަ ދުވަސް ފާހަގަކުރަނީ ބައިނަލްއަޤްވާމީ އެންޓި-ކޮރަޕްޝަން ދުވަހުގެ ގޮތުގައެވެ.
ކޮމެންޓު ފޮނުވާ